პარლამენტის პლენარულ სხდომაზე საარჩევნო ცვლილებასთან დაკავშირებული კანონპროექტის კენჭისყრა გაიმართა

14 ნოემბერი 2019
პარლამენტის პლენარულ სხდომაზე საარჩევნო ცვლილებასთან დაკავშირებული კანონპროექტის კენჭისყრა გაიმართა
პლენარული სხდომის დღის წესრიგით გათვალისწინებული იყო საარჩევნო ცვლილებასთან დაკავშირებული კანონპროექტის კენჭისყრა.
 
სხდომაზე რეგისტრაცია გაიარა 141 დეპუტატმა. რის შემდეგაც გაიმართა კენჭისყრის პროცედურა.
 
პარლამენტის თავმჯდომარემ, არჩილ თალაკვაძემ კოლეგებს მიმართა, რომ კენჭისყრისას კარგად გაიაზრონ პასუხისმგებლობა მიღებულ გადაწტვეტილებასთან დაკავშირებით.
 
„ერთი წლის წინ ჩვენ მივიღეთ ისტორიული გადაწყვეტილება და შევცვალეთ საქართველოს კონსტიტუცია. გავაკეთეთ საკონსტიტუციო რეფორმა, რომლის ფარგლებშიც ქვეყანა გადავიდა საპარლამენტიო მმართველობის მოდელზე. ამ რეფორმის ფარგლებშიც, ერთი წლის წინ ჩვენ შევცვალეთ ასევე მნიშვნელოვანი ნაწილი ჩვენი საარჩევნო სისტემის და მაშინ მივიღეთ გადაწყვეტილება, რომ ქვეყანა 2024 წელს გადავიდოდა პროპორციულ საარჩევნო სისტემაზე. დღეს კენჭს ვუყრით ინიციატივას, რომლის მიხედვითაც 2024 წელს დანიშნული პროპორციული არჩევნები უნდა ჩატარდეს 2020 წელს. გთხოვთ, ყველამ კიდევ ერთხელ გაიაზროთ თქვენი პასუხისმგებლობა ამასთან დაკავშირებით და ისე მიიღოთ გადაწყვეტილება“, - განაცხადა პარლამენტის თავმჯდომარემ.
 
ჩატარებული კენჭისყრის შედეგად 101 დეპუტატმა დაუჭირა მხარი წარმოდგენილ ცვლილებას, 3 წინააღმდეგია. ეს ხმები არ აღმოჩნდა საკმარისი გადაწყვეტილების მისაღებად.
 
 კენჭისყრის შემდეგ სხდომაზე შესვენება გამოცხადდა.