პარლამენტის აგრარულ საკითხთა კომიტეტის სხდომაზე კომიტეტთან არსებული აგროდაზღვევის სახელმწიფო პოლიტიკის სამუშაო ჯგუფის გაწეული მუშაობის შედეგების შესახებ ინფორმაცია მოისმინეს და დაამტკიცეს კომიტეტის რეკომენდაციები აგროდაზღვევის სახელმწიფო პოლიტიკის ფარგლებში გასატარებელი ღონისძიებების შესახებ.

ორივე საკითხი სხდომაზე აგრარულ საკითხთა კომიტეტის თავმჯდომარე ნინო წილოსანმა წარადგინა.

„ბოლო წლებში პარლამენტის მიერ განხორციელებული პოლიტიკის შედეგად, ხელისუფლების მიერ მიღებული გადაწყვეტილებების შედეგად, დინამიურად ვითარდება სოფლის მეურნეობა ქვეყანაში. ეს არის მეტად სენსიტიური დარგი, მომატებული რისკების შემცველი და ამიტომ მნიშვნელოვანია, რომ აგროდაზღვევის კუთხით შემუშავდეს კანონპროექტი და აგროდაზღვევის მიმართულებით სხვა აქტივობებიც განხორციელდეს“, - განაცხადა კომიტეტის თავმჯდომარის პირველმა მოადგილე გელა სამხარაულმა.

აგროდაზღვევის სახელმწიფო პოლიტიკის სამუშაო ჯგუფი სოფლის მეურნეობის სექტორში აგროდაზღვევის შემდგომი განვითარების და სასოფლო-სამეურნეო საქმიანობაში ჩართული მოსახლეობის ხელშეწყობის მიზნით კომიტეტთან 2022 წლის 11 მარტის გადაწყვეტილებით შეიქმნა. ჯგუფის მიზანს სოფლის მეურნეობის სექტორში სადაზღვევო სისტემის შემდგომი განვითარება და ინსტიტუციური გაძლიერება, ასევე აგროდაზღვევის სახელმწიფო პოლიტიკის ძირითადი მიმართულებების განსაზღვრის მიზნით რეკომენდაციების შემუშავება წარმოადგენდა. სამუშაო ჯგუფში ჩართული იყვნენ სახელმწიფო და კერძო სტრუქტურების, სადაზღვევო კომპანიების, ფერმერთა წარმომადგენლები და სხვა ჩართული მხარეები. აგროდაზღვევის სახელმწიფო პოლიტიკის სამუშაო ჯგუფის მიერ შემუშავებული რეკომენდაციები შესაბამის უწყებებს გადაეგზავნება.