ევროპასთან ინტეგრაციის კომიტეტმა „საზღვაო შრომის კონვენციას“ გამომდინარე კანონპროექტებთან ერთად, მხარი დაუჭირა
ევროპასთან ინტეგრაციის კომიტეტმა „საზღვაო შრომის კონვენცია“ და მისგან გამომდინარე კანონპროექტები განიხილა, რომელიც სხდომაზე, ეკონომიკისა და მდგრადი განვითარების მინისტრის მოადგილე გურამ გურამიშვილმა წარადგინა.
„საზღვაო შრომის კონვენცია“ აერთიანებს იმ ძირითად პრინციპებს, რომელიც დაკავშირებულია მეზღვაურთა შრომის უსაფრთხოებასა და ღირსეული სამუშაო პირობების შექმნასთან. ასევე, მისი რატიფიცირება, „მეზღვაურთა შრომის შესახებ“ ახალი კანონის მიღების საფუძველი გახდება.
მომხსენებლის თქმით, კონვენციასთან საქართველოს მიერთება სრულიად მიესადაგება ასოცირების ხელშეკრულებით გათვალისწინებულ ვალდებულებებს. მეზღვაურებს ხშირად უწევთ მძიმე პირობებში მუშაობა, საკუთარი ჯანმრთელობის და სიცოცხლის ფასად, ამიტომ მნიშვნელოვანია დაცული იყოს საერთაშორისო ნორმებით გარანტირებული მათი შრომის და დასვენების პირობები.
მთავრობის წარმომადგენლის განმარტებით, „მეზღვაურთა შრომის შესახებ“ კანონპროექტთა პაკეტი, განსაზღვრავს საქართველოს სახელმწიფო დროშით მცურავ კომერციულ საქმიანობაში ჩართულ გემებზე მეზღვაურების დასაქმებისა და საქმიანობის წესებს, ასევე, მეზღვაურთა დასაქმების სფეროში მოქმედი სამსახურების და გემთმფლობელების მიერ ნებისმიერი დროშით მცურავ გემზე საქართველოს მოქალაქე მეზღვაურთა დასაქმების უნიფიცირებულ სტანდარტებს.
