გიორგი გაბუნიამ საერთაშორისო ლიტერატურული ფესტივალის „პოეზია უპირველეს ყოვლისა“ დახურვის ცერემონიის მონაწილეებს სიტყვით მიმართა
საქართველოს პარლამენტის კულტურის კომიტეტის თავმჯდომარე გიორგი გაბუნია საერთაშორისო ლიტერატურული ფესტივალის „პოეზია უპირველეს ყოვლისა“ საზეიმო დახურვას დაესწრო და დამსწრე საზოგადოებას მისასალმებელი სიტყვით მიმართა.
გიორგი გაბუნიამ ფესტივალის ისტორიულ მნიშვნელობაზე გაამახვილა ყურადღება და აღნიშნა, რომ ღონისძიება განსაკუთრებულ როლს ასრულებს თანამედროვე ქართული ლიტერატურის პოპულარიზაციაში როგორც ქვეყნის შიგნით, ისე მის ფარგლებს გარეთ. ის ასევე ხელს უწყობს უცხოელ ავტორებთან თანამშრომლობის გაღრმავებას და თაობებს შორის ლიტერატურული დიალოგის განვითარებას.
ფესტივალის საზეიმო დახურვა რუსთაველის სახელობის სახელმწიფო თეატრში გაიმართა, რაც სიმბოლურად უკავშირდება პოეზიის დღის ისტორიულ ტრადიციას, რომელიც 1920 წელს დაარსდა გალაკტიონ ტაბიძის, ტიციან ტაბიძისა და პაოლო იაშვილის ინიციატივით.
ფესტივალის ფარგლებში მოეწყო ლიტერატურული საღამოები, იუბილეები, გამოფენები, მასტერკლასები და შეხვედრები მკითხველთან საქართველოს სხვადასხვა ქალაქში: გორში, მცხეთაში, ბათუმსა და მთიან აჭარაში.
