საქართველოს პარლამენტის არგენტინის რესპუბლიკის პარლამენტთან მეგობრობის ჯგუფის ხელმძღვანელმა, საგარეო ურთიერთობათა კომიტეტის თავმჯდომარის პირველმა მოადგილემ, გიორგი ხელაშვილმა პარლამენტარიზმის საერთაშორისო დღესთან დაკავშირებით, ბუენოს-აირესის პარლამენტის მიერ გამართულ ღონისძიებაში მომხსენებლის სტატუსით მიიღო მონაწილეობა.

გიორგი ხელაშვილმა სიტყვით გამოსვლისას საქართველოს პარლამენტის მიერ განხორციელებულ რეფორმებზე ისაუბრა. მან ყურადღება გაამახვილა საკონსტიტუციო რეფორმაზე, რომლის მიხედვით ქვეყანა სრულად გადავიდა საპარლამენტო მართვის მოდელზე.

გიორგი ხელაშვილმა საქართველოს პარლამენტის რეგლამენტში საზედამხედველო ფუნქციის გაძლიერების კუთხით შემოღებულ მექანიზმებზე ისაუბრა.

არგენტინის პარლამენტთან მეგობრობის ჯგუფის ხელმძღვანელმა დამსწრე საზოგადოებას საქართველოს პარლამენტის, როგორც უმაღლესი საკანონმდებლო ორგანოს საქმიანობაში მოქალაქეთა ჩართულობის გაძლიერების, ასევე ინფორმაციაზე ხელმისაწვდომობის კუთხით გატარებულ რეფორმებთან დაკავშირებით გამოცდილება გაუზიარა.

„ჰიბრიდულ რეჟიმში გამართულ ღონისძიებაზე სიტყვით გამოსვლისას კოლეგებს გავუზიარე პარლამენტის გამოცდილება მოქალაქეთა ჩართულობის და გამჭვირვალობის კუთხით, რომლითაც საქართველოს პარლამენტი დამსახურებულად ითვლება გამორჩეულ საკანონმდებლო ორგანოდ მსოფლიოში“, - განაცხადა შეხვედრის დასრულების შემდეგ გიორგი ხელაშვილმა.