გივი მიქანაძემ ტექნიკური უნივერსიტეტის იურიდიული ფაკულტეტის სტუდენტებისთვის საჯარო ლექცია გამართა
საქართველოს ტექნიკური უნივერსიტეტის 100 წლის იუბილესთან დაკავშირებით, სამართლის სფეროში მოღვაწე ექსპერტების, სპეციალისტების და პოლიტიკოსების მონაწილეობით, იურიდიული ფაკულტეტის სტუდენტებისთვის საჯარო ლექციები იმართება.
აღნიშნული პროექტის ფარგლებში, პარლამენტის ღია მმართველობის მუდმივმოქმედი კომისიის თავმჯდომარემ, საარჩევნო კანონმდებლობის რევიზიის სამუშაო ჯგუფის ხელმძღვანელმა, გივი მიქანაძემ მომავალი იურისტებისთვის საჯარო ლექცია გამართა.
პარლამენტის წევრმა სტუდენტებს ის სიახლეები გააცნო, რომლებიც ღია მმართველობის კუთხით არის დანერგილი და იმ საკანონმდებლო ცვლილებებზე ისაუბრა, რომელიც საარჩევნო კანონმდებლობის კუთხით განხორციელდა.
გივი მიქანაძემ ახალგაზრდებთან „საჯარო სამსახურის შესახებ“ კანონში განხორციელებულ ცვლილებებზეც ისაუბრა, რომელიც ფრაქცია „ქართული ოცნების“ ინიცირებით განხორციელდა და მიზნად ისახავს სტაჟირების ახალი წესის დამკვიდრებას და სტაჟირების სამუშაო სტაჟად ჩათვლას ითვალისწინებს.
მანვე სტუდენტებს ევროკავშირის 12 პუნქტიანი რეკომენდაციების შესრულების მიმდინარეობის შესახებ ინფორმაცია გააცნო.
პარლამენტის წევრსა და სტუდენტებს შორის გამართული შეხვედრა ინტერაქციულად, კითხვა-პასუხის რეჟიმში წარიმართა.
ახალგაზრდებმა გივი მიქანაძეს სხვადასხვა საკითხებზე საკუთარი მოსაზრებები გააცნეს და გამართული შეხვედრისთვის მადლობა გადაუხადეს.
