პარლამენტის თავმჯდომარის მოადგილემ, ირმა ინაშვილმა ბრიფინგი გამართა და ბიუროს დღევანდელ სხდომაზე მიღებულ გადაწყვეტილებაზე, რომელიც „საქართველოს პატრიოტების“ მიერ ინიცირებული პარლამენტის რეზოლუციის პროექტის პლენარულ სხდომაზე განხილვას შეეხებოდა, განცხადება გააკეთა.

„თითქმის ნახევარი წელია საქართველოს პარლამენტში ფრაქცია „საქართველოს პატრიოტების“ ინიციატივით შემოსულია რეზოლუცია, რომელიც სააკაშვილ-ბოკერიას მმართველობის დანაშაულებრივ რეჟიმად შეფასებას ითვალისწინებს. მოგეხსენებათ ისიც, რომ იურიდიულ საკითხთა კომიტეტში იყო განხილვები, მომზადდა სათანადო დასკვნა და უკვე პლენარული სხდომების დღის წესრიგში გადმოინაცვლა „პატრიოტების“ ამ რეზოლუციამ. ქვეყნის მასშტაბით რეზოლუციას ხელი მოაწერა უკვე 400 ათასმა მოქალაქემ. ბიუროს სხდომაზე იქნა მიღებული გადაწყვეტილება, რომ „საქართველოს პატრიოტების“ ეს რეზოლუცია, რომელიც ითვალისწინებს სააკაშვილ-ბოკერიას მმართველობის შეფასებას დანაშაულებრივ რეჟიმად, დღეს გამოვიდეს პარლამენტის სხდომაზე განსახილველად. ეს არის მნიშვნელოვანი პროცესის დასაწყისი და ამ პროცესს ჰქვია ქვეყანაში სამართლიანობის აღდგენა“, - განაცხადა ირმა ინაშვილმა.