გენდერული თანასწორობის მუდმივმოქმედი საპარლამენტო საბჭოს წევრები კავკასიის უნივერსიტეტის სტუდენტებს შეხვდნენ.

როგორც გენდერული თანასწორობის საბჭოს თავმჯდომარე ნინო წილოსანმა განაცხადა, საუბარი გაიმართა მიმდინარე წელს გენდერული თანასწორობის მიმართულებით განხორციელებულ მნიშვნელოვან ცვლილებებზე და ზოგადად, გენდერული მეინსტრიმინგის მნიშვნელობაზე.

 „სტუდენტებს ვესაუბრეთ რამდენიმე დღის წინ პარლამენტის მიერ დამტკიცებულ გენდერული გავლენის ანალიზის (GIA) ინსტიტუციონალიზაციაზე. აღნიშნული საკანონმდებლო ცვლილება საშუალებას მოგვცემს, რომ ყველა ინიციატორმა განმარტებით ბარათში იმსჯელოს ესა თუ ის ცვლილება რა გავლენას იქონიებს ქალებსა და კაცებზე და აქტიურ დღის წესრიგში შემოვიტანოთ ქალების საჭიროებებზე მორგებული პოლიტიკის ჩამოყალიბება. შეკითხვები, ასევე, შეეხებოდა რეგულირების გავლენის ანალიზს (RIA) და ზოგადად, პარლამენტში მიმდინარე საკანონმდებლო პროცესს“, - აღნიშნა ნინო წილოსანმა.

​შეხვედრას, ასევე, ესწრებოდა გენდერული თანასწორობის საბჭოს წევრი მიხეილ სარჯველაძე.