„ქალთა ეკონომიკური გაძლიერების კონცეფცია უახლოეს პერიოდში დაინიცირდება. მნიშვნელოვანია, რომ ეს მოხდება მულტიპარტიულ ფორმატში და დოკუმენტს პრაქტიკულად, პარლამენტის ყველა პოლიტიკური ჯგუფის წარმომადგენელი აწერს ხელს. ქალების გაძლიერება და მათი შესაძლებლობების რეალიზება პირდაპირ არის დაკავშირებული ქვეყნის ეკონომიკურ მდგრადობასთან,“ - განაცხადა გენდერული თანასწორობის მუდმივმოქმედი საპარლამენტო საბჭოს თავმჯდომარემ, ნინო წილოსანმა საბჭოს სხდომაზე.

მისი თქმით, კონცეფცია გრძელვადიან ჭრილში მულტისექტორულად მიმოიხილავს ქალების ეკონომიკურ გაძლიერებაზე სახელწმიფოს პოზიტიურ ვალდებულებას და იმ აუცილებელ ნაბიჯებს, რომელიც უნდა გადაიდგას.

კონცეფცია მოიცავს შვიდ მიმართულებას, ესენია: აუნაზღაურებელი და ზრუნვის შრომის აღიარება, შემცირება და განაწილება; ეკონომიკურ რესურსებზე თანაბარი წვდომა; საჯარო სექტორის შესყიდვების და დასაქმების პრაქტიკის გაუმჯობესება; კერძო სექტორში დასაქმების პრაქტიკის გაუმჯობესება; ხილვადობის, კოლექტიური ხმისა და წარმომადგენლობის გაძლიერება; გენდერულად მგრძნობიარე სამართლებრივი ჩარჩოს გაძლიერება და წინააღმდეგობრივ სოციალურ ნორმებთან ბრძოლა.

ნინო წილოსანის განცხადებით, ევროკომისიის მიერ განსაზღვრული 12-პუნქტიანი გეგმის მე-9 რეკომენდაციის ერთ-ერთი მნიშვნელოვანი ასპექტი ქალთა ეკონომიკური გაძლიერებაა.

​მისი თქმით, გენდერული საბჭოს მიერ ქალთა ეკონომიკური გაძლიერების სახელწმიფო კონცეფციის დაინიცირება და შემდეგ მისი მიღება იქნება სწორედ ამ რეკომენდაციის შესრულების ერთ-ერთი კომპონენტი.