იურიდიულ საკითხთა კომიტეტმა მეორე მოსმენისთვის, დაჩქარებული წესით, განიხილა საარჩევნო კოდექსში შესატანი ცვლილებები.

როგორც კანონპროექტის ერთ-ერთმა ინიციატორმა, გურამ მაჭარაშვილმა განაცხადა, პარლამენტის პლენარულ სხდომაზე საკითხის პირველი მოსმენით განხილვის დროს, ოპოზიციასთან მიღწეული ზოგადი პრინციპული შეთანხმების საფუძველზე, კანონპროექტში ცვლილებები შევა.

მისი თქმით, როგორც მაჟორიტარული საარჩევნო სისტემით არჩეული საკრებულოს წევრის უფლებამოსილება, ასევე, პროპორციული საარჩევნო სისტემით არჩეული საკრებულოს გამოკლებული წევრის ადგილმონაცვლე წევრის უფლებამოსილება ცნობილი იქნება შემაჯამებელი ოქმის გამოქვეყნებიდან ერთი და იგივე ვადაში, რაც ჩაიწერა, მათ შორის, ცესკოსთან კონსულტაციების საფუძველზე იმიტომ, რომ აქ გათვალისწინებულია ოქმის გასაჩივრების ვადები.

​კანონპროექტის თანახმად, ცვლილება შევა კანონის 135-ე მუხლშიც, რომელიც ადგენს მუნიციპალიტეტის ორგანოების უფლებამოსილებათა ვადებს, კერძოდ:

• ახალარჩეული საკრებულოს და მისი წევრების უფლებამოსილება იწყება არჩევნების საბოლოო შედეგების იმ შემაჯამებელი ოქმის ცესკოს ოფიციალური ვებგვერდზე გამოქვეყნებიდან მე-14 დღიდან, რომლითაც ამ საკრებულოს სრული შემადგენლობის არანაკლებ ორი მესამედის არჩევა დასტურდება;

• საკრებულოს შუალედურ არჩევნებში არჩეული წევრის უფლებამოსილება იწყება საბოლოო შედეგების შემაჯამებელი ოქმის გამოქვეყნებიდან მე-14 დღიდან;

• პროპორციული საარჩევნო სისტემით არჩეული საკრებულოს გამოკლებული წევრის ადგილმონაცვლე საკრებულოს წევრის უფლებამოსილება იწყება მისი ადგილმონაცვლეობის ცნობის შესახებ საარჩევნო კომისიის თავმჯდომარის მიერ სათანადო აქტის გამოცემიდან მე-14 დღიდან.

პროექტის თანახმად, ახალარჩეული მერის უფლებამოსილებაც დაიწყება არჩევნების საბოლოო შედეგების შემაჯამებელი ოქმი ცესკოს ოფიციალურ ვებგვერდზე გამოქვეყნებიდან მე-14 დღიდან.

 კანონპროექტის თანახმად, კანონის ამოქმედებისთანავე დაიწყება საკრებულოს იმ არჩეული წევრის უფლებამოსილება, რომლის უფლებამოსილებაც ამ კანონის ამოქმედებამდე არ დაწყებულა, მაგრამ რომლის არჩევა დასტურდება შემაჯამებელი ოქმით.

ასევე, ამ კანონის ამოქმედებისთანავე დაიწყება პროპორციული საარჩევნო სისტემით არჩეული საკრებულოს გამოკლებული წევრის იმ ადგილმონაცვლე პირის უფლებამოსილება, რომელიც ამ კანონის ამოქმედებამდე არ დაწყებულა, თუმცა, საარჩევნო კომისიის თავმჯდომარის სამართლებრივი აქტი მისი ადგილმონაცვლეობის ცნობის შესახებ, ძალაშია შესული.

იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, პრინციპი არის ერთი - მოქალაქეების ინტერესები მაქსიმალურად ეფექტიანად უნდა იყოს დაცული და მნიშვნელობა არ აქვს ეს იქნება ბათუმში, სენაკში თუ სხვაგან.

​„ოპოზიციონერი კოლეგებისა და არასამთავრობო სექტორის მხრიდან იყო შემოთავაზებები და ჩვენ დისკუსიის შედეგად შევჯერდით, რომ იქ სადაც შესაძლებელია იყოს გარკვეული გამოწვევები, ეს საკითხები მაქსიმალურად დავაბალანსოთ და ჩვენი მოქალაქეების ინტერესების გათვალისწინება მაქსიმალურად უზრუნველვყოთ, იქნება ეს ცენტრალურ სახელისუფლებო დონეზე, თუ იქნება ეს, ამ შემთხვევაში, თვითმმართველობების დონეზე“, - აღნიშნა ანრი ოხანაშვილმა.