22-23 იანვარს საქართველოს პარლამენტის თავმჯდომარისა და საქართველოს პარლამენტის ბიუროს წევრების მონაწილეობით გენდერული თანასწორობის საკითხებზე შეხვედრა და დისკუსია გაიმართა.

მსჯელობისას აქცენტი გაკეთდა ქალთა ეკონომიკური და პოლიტიკური გაძლიერების საკითხებზე, საქართველოს წინაშე მდგარ გამოწვევებზე, ასევე გენდერული თანასწორობის მიმართულებით ნაკისრ ვალდებულებებსა და არსებულ საერთაშორისო მექანიზმებზე.

„გენდერული თანასწორობისა და ინკლუზიურობის პრინციპის განმტკიცება მნიშვნელოვანია, ვინაიდან ეს აძლიერებს პარლამენტს და მის შესაძლებლობებს. რა თქმა უნდა, ამ კუთხით არსებობს ბევრი გამოწვევა, თუმცა მიღწევაც ბევრი გვაქვს. მათ შორის, ადგილობრივმა თვითთმმართველობის არჩევნებმაც აჩვენა, რომ გენდერული კვოტირება წარმატებით მუშაობს. დღეს გვყავს საკრებულოებში პროპორციული წესით არჩეული 441 ქალი, ამ კუთხით კი მნიშვნელოვანია რომ მეტად პროპორციული წესის შემოღებამ ადგილობრივ დონეზე ქალთა მონაწილეობის გაზრდა გამოიწვია“,  - განაცხადა შალვა პაპუაშვილმა.

პარლამენტის თავმჯდომარემ მხარდაჭერისთვის მადლობა გადაუხადა დონორ ორგანიზაციებს და ხაზი გაუსვა თანასწორობის მიღწევის ძალისხმევაში გენდერული თანასწორობის მუდმივმოქმედი საპარლამენტო საბჭოს განსაკუთრებულ როლსა და მუშაობას.

„თავად ის ფაქტი, რომ გენდერული თანასწორობის მიმართულებით არსებულ საკითხებს ექნება პარლამენტის თავმჯდომარის მხარდაჭერა და სურვილი, რომ ჩვენი ქვეყნის რეალობის გათვალისწინებით მაქსიმალურად ავამაღლოთ სტანდარტები, უკვე დამატებითი ნაბიჯია. მიხარია, რომ დღევანდელი შეხვედრა შედგა. დღეს შეხვედრაზე მყოფი პარლამენტის ყველა წევრი არის აზრის ლიდერი და პროფესიონალი დარგობრივი მიმართულებით. ამ შეხვედრის მიზანიც სწორედ ის იყო, რომ მათთან ერთად განგვეხილა გენდერული თანასწორობისა და ქალთა გაძლიერების მიმართულებით არსებული ყველა თანამედროვე ტენდენცია და ჩვენ მიერ საერთაშორისო დონეზე აღებული ვალდებულებები“, - აღნიშნა გენდერული თანასწორობის მუდმივმოქმედი საპარლამენტო საბჭოს თავმჯდომარემ, ნინო წილოსანმა.

შეხვედრები ორგანიზებული იყო ეროვნულ-დემოკრატიული ინსტიტუტის (NDI) და გაეროს განვითარების პროგრამის (UNDP) მიერ, საქართველოში დიდი ბრიტანეთისა და ჩრდილოეთ ირლანდიის გაერთიანებული სამეფოს მთავრობის საგარეო, თანამეგობრობის და განვითარების ოფისის კარგი მმართველობის ფონდისა (GGF) და შვედეთის სამეფოს მთავრობის ფინანსური მხარდაჭერით.