საქართველო-საბერძნეთის საპარლამენტო მეგობრობის ჯგუფის წევრები საბერძნეთში ოფიციალური ვიზიტის ფარგლებში, საბერძნეთის დემოკრატიული რესპუბლიკის პირველ დედაქალაქს, ქალაქ ნაფპლიონს ეწვივნენ.

საპარლამენტო დელეგაციის წევრებმა საბერძნეთში საქართველოს საგანგებო და სრულუფლებიან ელჩთან, დავით დონდუასთან ერთად, სამხედრო აკადემიის მუზეუმში საქართველო-საბერძნეთის დიპლომატიური ურთიერთობების 30 წლისთავისადმი მიძღვნილი საარქივო მასალის გამოფენა გახსნეს.

გამოფენის გახსნას დედაქალაქის მერი, დიმიტრიოს კოსტოუროსი და ქართული დიასპორის წარმომადგენლები ესწრებოდნენ.

მეგობრობის ჯგუფის წევრებმა ქალაქის ცენტრში მდებარე ქართველი მოქანდაკის, გიორგი გოგუას მიერ შექმნილი დიასპორის მონუმენტი ყვავილებით შეამკეს.

მეგობრობის ჯგუფის ხელმძღვანელის, გივი მიქანაძის განცხადებით, მნიშვნელოვანია დაძმობილებულ ქალაქებს, ნაფპლიონსა და ფოთს შორის შემდგომი ურთიერთობების გაღრმავება და ერთობლივ პროექტებზე მუშაობა.

ქალაქის მერი მიესალმა ქართული დელეგაციის ვიზიტს და გამოთქვა მზაობა ფოთთან აქტიური თანამშრომლობისათვის.

ვიზიტის ფარგლებში ქართველმა დეპუტატებმა შეხვედრა გამართეს ქალაქ ნაფპლიონში მცხოვრები ქართული დიასპორის წარმომადგენლებთან.

ქართული დელეგაციის შემადგენლობაში, რომლის ოფიციალური ვიზიტი საბერძნეთში 30 ივნისს დასრულდა, შედიოდნენ საქართველო-საბერძნეთის საპარლამენტო მეგობრობის ჯგუფის ხელმძღვანელი გივი მიქანაძე, პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძე და პოლიტიკური ჯგუფი „გირჩის“ წევრი ალექსანდრე რაქვიაშვილი.