ირინა ფრუიძე ღია პარლამენტის შესახებ საზოგადოების ცნობიერების ამაღლების კამპანიის ფარგლებში, ახალციხეში სამცხე-ჯავახეთის სახელმწიფო უნივერსიტეტის სტუდენტებს შეხვდა.

შეხვედრას ასევე ესწრებოდა ინფორმაციის თავისუფლების განვითარების ინსტიტუტის (IDFI) პროგრამების დირექტორი ლევან ავალიშვილი.

საჯარო შეხვედრები ემსახურება საზოგადოების ცნობიერების ამაღლებას პარლამენტის ღიაობის, გამჭვირვალობისა და ანგარიშვალდებულების შესახებ და საპარლამენტო საქმიანობაში მოქალაქეთა ჩართულობის გაზრდას.

სტუდენტები და ლექტორები გაეცნენ საქართველოს ღია პარლამენტის საქმიანობას, მიღწევებს და სამოქმედო გეგმებით აღებული ვალდებულებების შესრულების ანგარიშს.

„ახალგაზრდების ჩართულობა და მათი ინფორმირებულობა ძალიან მნიშვნელოვანია პარლამენტის იმიჯის ამაღლებისთვის და მის მიმართ ნდობის გაზრდისთვის. ჩვენ ბევრი ახალი ინსტრუმენტი შევქმენით პარლამენტის საქმიანობაში მოქალაქეების ჩართვის ხელშესაწყობად და მნიშვნელოვანია, რომ საზოგადოებამ, განსაკუთრებით ახალგაზრდობამ ამის შესახებ იცოდეს,“ - აღნიშნა ირინა ფრუიძემ.

შეხვედრის ორგანიზატორია საქართველოს პარლამენტი, ევროკავშირისა (EU) და გაეროს განვითარების პროგრამის (UNDP) ხელშეწყობით და ინფორმაციის თავისუფლების განვითარების ინსტიტუტთან (IDFI) თანამშრომლობით.