საქართველოს პარლამენტის ჩეხეთის რესპუბლიკის პარლამენტთან მეგობრობის ჯგუფის ხელმძღვანელი ირაკლი ჩიქოვანი ჩეხეთის რესპუბლიკის სენატის და დეპუტატთა პალატის ევროკავშირისა და ევროპულ საკითხთა კომიტეტების დელეგაციის წევრებს შეხვდა.

მხარეებმა შეხვედრაზე ისაუბრეს საქართველო-ჩეხეთის ორმხრივ ურთიერთობებზე, მათ შორის, საპარლამენტო კავშირებსა და სამომავლო თანამშრომლობაზე, ასევე ევროინტეგრაციაზე.

„ვისაუბრეთ ჩვენ ქვეყნებს შორის ორმხრივ ურთიერთობებზე, სავაჭრო-ეკონომიკური თვალსაზრისით არსებულ დინამიკაზე, ასევე განვიხილეთ ჩეხეთის რესპუბლიკის და საქართველოს რეგიონებს შორის ურთიერთკავშირების შესაძლებლობა. ყურადღება ასევე დაეთმო ევროკავშირის წევრობის კანდიდატის სტატუსის საკითხს. მნიშვნელოვანია, რომ მათ აღგვითქვეს მხარდაჭერის პირობა - ჩეხეთი მხარს დაუჭერს საქართველოს კანდიდატის სტატუსს“, - განაცხადა შეხვედრის შემდეგ ირაკლი ჩიქოვანმა.

შეხვედრაში ასევე მონაწილეობდნენ საქართველოს პარლამენტის წევრები: თეონა აქუბარდია, გელა სამხარაული, ლევან ქარუმიძე და გრეტა წიწავა.