გურჯაანის, სიღნაღის, დედოფლისწყაროსა და საგარეჯოს მაჟორიტარი დეპუტატი დავით სონღულაშვილი საგარეჯოელ ახალგაზრდებსა და სპორტსმენებს შეხვდა.

ახალგაზრდებმა დეპუტატთან სხვადასხვა საკითხებთან დაკავშირებით ისაუბრეს, მათ შორის ერთ-ერთი მნიშვნელოვანი - თანამედროვე სტანდარტებით აღჭურვილი ბიბლიოთეკის აშენება იყო.

 საუბარი ასევე შეეხო არაფორმალური განათლების ხელშეწყობის საჭიროებასაც და ინტერნეტიზაციას. რაც შეეხება სპორტსმენებს, მათ სპორტული სივრცეების რეაბილიტაციის საკითხი დააყენეს. როგორც პარლამენტის წევრმა აღნიშნა, ბიბლიოთეკის საპროექტო სამუშაოებისთვის პროცედურები უკვე დაწყებულია და მალე აღნიშნული პრობლემა გადაჭრილი იქნება.

„მოხარული ვარ, რომ საგარეჯოელი ახალგაზრდები აქტიურად არიან ჩართულები მუნიციპალიტეტის ცხოვრებაში და მუდმივად კომუნიკაციაში არიან ადგილობრივ ხელისუფლებასთან, იმისთვის, რომ მაქსიმალურად ხელი შეუწყონ ახალგაზრდული გარემოს გაჯანსაღებას საგარეჯოში და დაეხმარონ ერთმანეთს პროექტების დაგეგმვასა და განხორციელებაში. სწორედ, ერთ-ერთი ასეთი მუშაობის შედეგი იქნება მალე ახალი სივრცის გაჩენა საგარეჯოში, სადაც ბიბლიოთეკა განთავსდება,“ - აღნიშნა დავით სონღულაშვილმა.

​აღსანიშნავია, რომ დავით სონღულაშვილის ინიციატივით უკვე 5 წელია, რაც გურჯაანის მუნიციპალიტეტში ახალგაზრდული საბჭო არსებობს, რომელიც ახალგაზრდული გარემოს ქმნის და აქტიურად მონაწილეობს საზოგადოებრივ ცხოვრებაში. შეხვედრაში ასევე მონაწილეობდნენ საგარეჯოს მუნიციპალიტეტის მერი ავთანდილ გულიკაშვილი და საკრებულოს თავმჯდომარე ალექსი გილაშვილი.