დიასპორისა და კავკასიის საკითხთა კომიტეტის თავმჯდომარე, თეიმურაზ ჭკუასელი ისრაელის სახელმწიფოს ეწვევა
მიმდინარე წლის 11-16 აპრილს, ისრაელის ქართული წარმოშობის საზოგადოების ერთი ნაწილის ინიციატივით, საქართველოს პარლამენტის დიასპორისა და კავკასიის საკითხთა კომიტეტის თავმჯდომარე, თეიმურაზ ჭკუასელი ისრაელის სახელმწიფოს ეწვევა.
ვიზიტის ფარგლებში დაგეგმილია როგორც ოფიციალური, ასევე არაოფიციალური შეხვედრები საქართველოდან ემიგრირებული მოქალაქეებისა და ისრაელში მცხოვრები ჩვენი თანამემამულეების მონაწილეობით. გაიმართება კულტურული ღონისძიებები, იმსჯელებენ მომავალი კავშირების განმტკიცების, ქართული სახელმწიფოს პოპულარიზაციისა და განსახორციელებელ ერთობლივ ღონისძიებებზე, რაც ხელს შეუწყობს ქართული ემიგრაციის დედასამშობლოსთან დაახლოებას და ორ ქვეყანას შორის კულტურულ-საგანმანათლებლო კავშირების განმტკიცებას.
ჩვენი თანამემამულეების მიერ ისრაელში დაფუძნებული ბიზნეს ჯგუფ „ამსალემ მედიკალი“-ს წარმომადგენლების ინიციატივით შეხვედრები გაიმართება ბიზნეს წრეებთან და იქ მოღვაწე წარმატებულ ქართველ ემიგრანტებთან, უცხოური ინვესტიციების საქართველოში მოზიდვის მიზნით. ასევე იმსჯელებენ სხვადასხვა საქველმოქმედო ღონისძიებების განხორციელებაზე, ვინაიდან „ამსალემ მედიკალი“-ს ჯგუფი ქართული საზოგადოებისათვის, უპირველეს ყოვლისა, ცნობილია თავისი საქველმოქმედო საქმიანობით.
ვიზიტის ფარგლებში, შეხვედრები გაიმართება ისრაელის სახელმწიფოს პარლამენტში - ქნესეთში, სადაც ისაუბრებენ, როგორც ქვეყნის საპარლამენტთაშორისო ურთიერთობებზე, ისე დიასპორებთან ურთიერთობებისა და მსოფლიო მიგრაციის აქტუალურ საკითხებზე.
