დიასპორისა და კავკასიის საკითხთა კომიტეტის თავმჯდომარის, თეიმურაზ ჭკუასელის და დიასპორის საკითხებში საქართველოს სახელმწიფო მინისტრის პირველი მოადგილის, ზაალ სარაჯიშვილის შეხვედრა საქართველოს სამეფო სახლის მეთაურთან, დავით ბაგრატიონ-მუხრანელთან
ცენტრალური და დასავლეთ ევროპის ქვეყნებში ჩვენი თანამემამულეების და დიასპორული ორგანიზაციების პრობლემური საკითხები და მათთან ურთიერთობის სამომავლო გეგმები, ქართული სამეფო კარის მიზნები, ამოცანები, და სახელმწიფო სტრუქტურებთან ურთიერთობა და საზოგადოებრივ ცხოვრებაში ჩართულობა იყო საუბრის თემა შეხვედრაზე, რომელიც დღეს, დიასპორისა და კავკასიის საკითხთა კომიტეტში, კომიტეტის თავმჯდომარეს, თეიმურაზ ჭკუასელს, დიასპორის საკითხებში საქართველოს სახელმწიფო მინისტრის პირველ მოადგილეს, ზაალ სარაჯიშვილსა და საქართველოს სამეფო სახლის მეთაურს, დავით ბაგრატიონ-მუხრანელს შორის გაიმართა.
შეხვედრაზე აღინიშნა, რომ საქართველოს პოპულარიზაცია, ემიგრაციაში, დიასპორაში მყოფი ქართველებისთვის ქართული ენისა და თვითმყოფადობის შენარჩუნებაში ხელშეწყობა არის სწორედ ის საკითხები, რაც დიასპორის საკითხებში სახელმწიფო მინისტრის აპარატს, საპარლამენტო კომიტეტს და ქართული სამეფო ოჯახის თანამშრომლობას უდევს საფუძვლად.
„ევროპაში არსებულ არამმართველ სამეფო სახლებს აქვთ საზოგადოებრივად აქტიური ფუნქცია, რომელიც ახალგაზრდებზე, მოზარდებზე, მომავალ თაობაზეა ორიენტირებული და მათ სხვადასხვა პროექტებში ჩართულობას ითვალისწინებს. შესაბამისად, ქართულ სამეფო სახლთან ერთად პირველ ეტაპზე შეირჩა სწორედ მიმართულება, რაც სამეფო სახლის ახალგაზრდებისადმი მხარდაჭერაში და ჩართულობაში გამოიხატება“, - განაცხადა შეხვედრაზე დიასპორის საკითხებში საქართველოს სახელმწიფო მინისტრის პირველმა მოადგილემ, ზაალ სარაჯიშვილმა.
შეხვედრაზე დიასპორისა და კავკასიის საკითხთა კომიტეტის თავმჯდომარეს უკვე განხორციელებული პროექტების შესახებაც მიაწოდეს ინფორმაცია. ისაუბრეს პროექტზე “დევნილთა სამოქალაქო ჩართულობისა და განათლებისთვის“, რომელიც დიასპორის სამინისტროს, არასამთავრობო ორგანიზაცია “ქალთა თანადგომისა“ და სამეფო სახლის მხარდაჭერით განხორციელდა. პროექტის ფარგლებში კომპაქტურად ჩასახლებულ ადგილებში დევნილებთან სახელმწიფო სტრუქტურებისა და არასამთავრობო სექტორის წარმომადგენელთა მონაწილეობით რამდენიმე შეხვედრა შედგა. პროექტის ფარგლებში სამეფო სახლის მხარდაჭერით, დევნილი ბავშვები საზოგადოებაში რეინტეგრაციის მიზნით, ესპანეთში გაემგზავრნენ.
არასამთავრობო ორგანიზაცია “ქალთა თანადგომის“ წარმომადგენლებმა, ახალი პროექტის, „საქართველოს დიასპორული ორგანიზაციების საერთაშორისო ახალგაზრდული ფესტივალის“ განხორციელების მიზნებსა და სამომავლო გეგმებზეც ისაუბრეს.
მხარეები სამომავლოდ ურთიერთობის გააქტიურებაზე შეთანხმდნენ. დიასპორისა და კავკასიის საკითხთა კომიტეტის თავმჯდომარემ, თეიმურაზ ჭკუასელმა მხარდაჭერა აღუთქვა და თანამშრომლობისთვის მზადყოფნა გამოთქვა.
