საქართველოს პარლამენტის წევრი ენზელ მკოიანი ნინოწმინდის მუნიციპალიტეტის სოფელ სათხაში, ალბერტ ისოიანის სახელობის, ახლად აშენებული ეთნოგრაფიული მუზეუმის საზეიმო გახსნას დაესწრო.

მუზეუმში გამოფენილია სოფლისათვის დამახასიათებელი ძველი ტრადიციული საყოფაცხოვრებო ნივთები და სათხის მკვიდრი პროფესორების, აკადემიკოსების, მეცნიერებისა და ქველმოქმედების ფოტოსურათები.

„დღეს ჩვენთვის დიდი დღესასწაულია. მინდა ყველას მივულოცო ეს ლამაზი დღე. მინდა მადლობა გადავუხადო ისოიანების ოჯახს, ვისი დაფინანსებითაც აშენდა მუზეუმი. ისოიანების ოჯახის სურვილია, ეთნოგრაფიული მუზეუმი, მუნიციპალიტეტს, სიმბოლურად, ერთი ლარის ღირებულებით გადასცენ“, - განაცხადა ენზელ მკოიანმა.

ღონისძიება დაიწყეს მუზეუმისკენ მიმავალი ახალად აშენებული ხიდის გახსნით.

მუზეუმის კურთხევის ცერემონიალი გაიმართა საქართველოში სომეხთა სამოციქულო ეკლესიის ეპარქიის წინამძღვრის, კირაკოს დავთიანის, ახალქალაქისა და კუმურდოს ეპარქიის მთავარ ეპისკოპოსის, მიტროპოლიტ ნიკოლოზ ფაჩუაშვილის, სამცხე-ჯავახეთისა და წალკის ვიკარიატის მაღაქია ამირიანისა და სხვა სასულიერო პირების მონაწილეობით.

მუზეუმის გახსნის ცერემონიალს დაესწრო 3-4 ათასი სტუმარი, მათ შორის სომხური სამოციქულო და მართლმადიდებლური ეკლესიის სასულიერო პირები, ნინოწმინდისა და ახალქალაქის მუნიციპალიტეტების ხელმძღვანელი პირები, ექიმები, მასწავლებლები, ელჩები, ასევე სომხეთიდან, რუსეთიდან და საქართველოს სხვადასხვა კუთხიდან ჩამოსული სტუმრები.