განათლების, მეცნიერებისა და კულტურის კომიტეტის თავმჯდომარე გენადი მარგველაშვილი თბილისის ივანე ჯავახიშვილის სახელობის სახელმწიფო უნივერსიტეტის ერთ-ერთი დამაარსებლის, ცნობილი მეცნიერის, მსოფლიოში სახელგანთქმული ფიზიოლოგის, ივანე ბერიტაშვილის 135 წლისთავისადმი მიძღვნილი წიგნის „ივანე ბერიტაშვილი - კიდევ ერთი ცდა/უცნობი ისტორიები ცნობილ მეცნიერზე“ პრეზენტაციაზე სიტყვით გამოვიდა.

წიგნის ავტორები არიან ნინო კაკულია და მერაბ ცაგარელი. დღევანდელი ღონისძიებით ივანე ჯავახიშვილის სახელობის თბილისის სახელმწიფო უნივერსიტეტში საიუბილეო კვირეული გაიხსნა. 

„ასეთი გამოცემები ძალიან მნიშვნელოვანია საზოგადოებისთვის. განსაკუთრებით კი ახალგაზრდობამ ზუსტად და მკაფიოდ უნდა იცოდეს იმ დიდი მოღვაწეების, იმ დიდი მეცნიერების ცხოვრებისეული ასპექტები, ცხოვრების ფრაგმენტები და გათენებული ყველა იმ ღამის შესახებ, რომლებმაც ჩვენს ალმა მატერს - ივანე ჯავახიშვილის სახელობის სახელმწიფო უნივერსიტეტს საფუძველი ჩაუყარეს. მე-20 საუკუნის დასაწყისში ეს იყო ნიჭის აფეთქება. ჩვენ ყველა მიმართულებით გვყავდნენ ძალიან ძლიერი მეცნიერები. თითოეული მათგანის შესახებ უნდა გამოვცეთ წიგნიც და გადავიღოთ ფილმიც, რათა მათი პოპულარიზაცია მოხდეს და ახალგაზრდები მათ ცხოვრებასა და მოღვაწეობას უკეთ გაეცნონ. სამომავლოდ ჩვენი ქვეყნის განვითარებისთვის ამ მაგალითების გაცოცხლებას და გაძლიერებას ალტერნატივა არ აქვს“, - განაცხადა განათლების, მეცნიერებისა და კულტურის კომიტეტის თავმჯდომარემ, გენადი მარგველაშვილმა.