ქ. დმანისის N1 საბავშვო ბაღში სააღმზრდელო პროცესი ახლად რეაბილიტირებულ გარემოში განახლდა.

ეს პირველი თანამედროვე სტანდარტებით აღჭურვილი ბაღია დმანისის მუნიციპალიტეტში. სააღმზრდელო პროცესის განახლებას  საქართველოს პარლამენტის წევრი, ბოლნისის, დმანისის, თეთრიწყაროსა და წალკის მაჟორიტარი გოგი მეშველიანი, ქვემო ქართლის გუბერნატორთან, შოთა რეხვიაშვილთან და ადგილობრივი  ხელისუფლების წარმომადგენლებთან ერთად დაესწრო. 

„კარგი სიახლე გვაქვს დმანისიდან - დღეს გაიხსნა თანამედროვე სტანდარტებით რეაბილიტირებული  N1  საბავშვო ბაღი. სააღმზრდელო პროცესის განახლებას ქვემო ქართლის გუბერნატორთან, შოთა რეხვიაშვილთან და ადგილობრივი  ხელისუფლების წარმომადგენლებთან ერთად დავესწარი. საბავშვო ბაღი  კოვიდ- რეგულაციების დაცვით ფუნქციონირებს. ეს პირველი თანამედროვე სტანდარტებით აღჭურვილი ბაღია დმანისის მუნიციპალიტეტში, აქ ყველა პირობაა შექმნილი იმისათვის, რომ ჩვენმა ბავშვებმა კომფორტულ გარემოში მიიღონ სკოლამდელი განათლება," - განაცხადა გოგი მეშველიანმა.

პროექტის ფარგლებში განხორციელდა შენობის სრული რეაბილიტაცია, მოეწყო ცენტრალური გათბობა, სააღმზრდელო ოთახები, საძინებლები, სველი წერტილები სამზარეულო. კეთილმოეწყო ეზო, დამონტაჟდა ატრაქციონები.

თანამედროვე სტანდარტებით აღჭურვილ ბაღში 4 ჯგუფი და 140 აღსაზრდელია.

სამუშაოების სრული ღირებულება 489912,02 ლარია (ადგილობრივი ბიუჯეტიდან გამოიყო 24 495, რეგიონული განვითარების ფონდიდან კი ამ პროექტის განსახორციელებლად გამოიყო 465417.02 ლარი).