მაჟორიტარი დამსწრე საზოგადოებას პარლამენტში საკუთარ საქმიანობაზე, იმ რეფორმებსა თუ ინიციატივებზე ესაუბრა, რომელბშიც აქტიურად მონაწილეობდა. მან საზოგადოებას მიაწოდა ინფორმაცია ბიუროს როლსა და საქმიანობაზე მაჟორიტარულ ოლქში, მათ შორის განხორციელებულ, მიმდინარე პროექტებზე, მოქალაქეებისათვის განკუთვნილ სერვისებსა და სამომავლო გეგმებზე.

შეხვედრას არასამთავრობო ორგანიზაციებთან ერთად მედიისა და ადგილობრივი ხელისუფლების წარმომადგენლები და დაინტერესებული მოქალაქეები ესწრებოდნენ. დამსწრე საზოგადოებას საშუალება მიეცა კითხვები დაესვა დეპუტატისათვის. 

„მაჟორიტარულ ოლქში მსგავსი ტიპის შეხვედრები ძალიან მნიშვნელოვანია, ჩვენ ადგილობრივი მოსახლეობის წინაშე ანგარიშვალდებულები ვართ და ამასთანავე ასე უკეთ ვეცნობით რეგიონში არსებულ პრობლემებს, ვიზიარებთ და ვცდილობთ ჩვენს ხელთ არსებული რესურსებით მაქსიმალური მხარდაჭერა აღვუთქვათ მათ. ასევე უაღრესად მნიშვნელოვნად მიმაჩნია სურამის ტურისტული პოტენციალის გამოყენება, რისთვისაც მეტი მუშაობა გვჭირდება. პრობლემა ჯერ კიდევ უამრავია, თუმცა ჩვენ აქტიურად ვართ ჩართულები თითოეული პრობლემის გადაჭრაში,“ - აღნიშნა სიმონ ნოზაძემ.

აღნიშნული ღონისძიება ეროვნულ-დემოკრატიული ინსტიტუტის ( NDI) მხარდაჭერითა და დიდი ბრიტანეთის მთავრობის UK aid-ის ფინანსური ხელშეწყობით განხორციელდა.