ხაშურში რეაბილიტირებულ შოთა რუსთაველის სახელობის N 9 საჯარო სკოლაში სასწავლო პროცესი დაიწყო. საზეიმო გახსნას ესწრებოდნენ საქართველოს განათლების მინისტრი, ალექსანდრე ჯეჯელავა, ხაშურის მაჟორიტარი დეპუტატი, სიმონ ნოზაძე, ხაშურის მუნიციპალიტეტის საკრებულოს თავჯდომარე, ვაჟა შუბითიძე, ხაშურის მუნიციპალიტეტის გამგებელი, გიორგი გურასპაშვილი, ხაშურის საგანმანათლებლო რესურსცენტრის უფროსი, ზვიად გოგუაძე და სხვები. სკოლის მოსწავლეები ახალგარემონტებული სპორტული და სააქტო დარბაზებით, თანამედროვე საკლასო ოთახებითა და ლაბორატორიებით აღჭურვილ სკოლაში შეუდგებიან სწავლას.

„ყველას ვულოცავ ახალ, რეაბილიტირებულ საჯარო სკოლას. მოწესრიგებული ინფრასტრუქტურა მნიშვნელოვანია სკოლის გამართული ფუნქციონირებისათვის. ინფრასტრუქტურულ გამართულობაზე არანაკლებ მნიშვნელოვანია სასწავლო პროგრამა და სახელმძღვანელოები. მე როგორც განათლების, კულტურისა და მეცნიერების კომიტეტის წევრს, მქვს ინტენსიური კონტაქტი მინისტრთან, მის მოადგილეებთან და ვიცი ახალ, კიდევ უფრო მაღალი დონის სასწავლო პროგრამებისა და სახელმძღვანელოების შედგენაზე, რაც თავისთავად დიდ გავლენას იქონიებს განათლების სისტემის გაუმჯობესებაზე. ის რაც აქ ვნახეთ კიდევ ერთხელ ადასტურებს იმას, რომ მაღალი კომპეტენცია და მონდომება ყველაფერს შესაძლებელს ხდის. ფაქტი, რომ ხაშურში ყოველ წელს იმატებს წარჩინებული მოსწავლეების რაოდენობა, მეტყველებს რაიონის მოსწავლეების მაღალ მოტივაციასა და მათ კარგ მომზადებაზე, რაც დიდ იმედს გვაძლევს, ვინაიდან განათლებული ერი ქვეყნის მომავალი სიძლიერის საწინდარია“, - განაცხადა სიმონ ნოზაძემ.