ხაშურის მუნიციპალიტეტში, № 43 ოლქის მაჟორიტარმა დეპუტატმა, სიმონ ნოზაძემ საზოგადოებას თავისი სადეპუტატო საქმიანობის შესახებ ანგარიში წარუდგინა. 

შეხვედრას ესწრებოდნენ ხაშურის რაიონის საკრებულოს თავმჯდომარე მიხეილ ჯანაშვილი, მერის მოადგილე ზურაბ ჩხიტუნიძე, ასევე მედიისა და არასამთარობო ორგანიზაციების წარმომადგენლები, დაინტერესებული მოქალაქეები, ხაშურის რაიონის საზოგადოების წარმომადგენლები და სხვა.

ანგარიში კითხვა-პასუხის რეჟიმში გაგრძელდა. დაისახა მომავლის გეგმები და გამოწვევები.
„ჩემთვის როგორც მაჟორიტარი დეპუტატისთვის ამომრჩეველთან უშუალო ურთიერთობა ძალზედ მნიშვნელოვანია“, - განაცხადა სიმონ ნოზაძემ.

„უნდა აღინიშნოს, რომ გარკვეული პროექტები წარმატებულად ხორციელდება, თუმცა კვლავ რჩება მთელი რიგი პრობლემებისა, რომელზეც ჩვენ რაიონის ხელმძღვანელობასთან ერთად აქტიურად ვაგრძელებთ მუშაობას. სურამის ტურიზმის პოტენციალის ამაღლება და ინფრასტრუქტურული პრობლემების გადაჭრა კვლავ აქტუალურ თემად რჩება სურამის მოსახლეობისათვის. ჩვენ ეს საკითხი ახლახან პარლამენტის ტრიბუნიდან კვლავ დავაყენეთ საქართველოს მთავრობის წინაშე. უახლოეს მომავალში აუცილებლად შევქმნით სამუშაო ჯგუფს, რომელიც აღნიშნულ საკითხზე იმუშავებს, და რა თქმა უნდა მე, როგორც თქვენი დეპუტატი უშუალოდ გავუწევ ამ მნიშვნელოვანი პროექტის კურირებას“. 

ღონისძიება ეროვნულ-დემოკრატიული ინსტიტუტის (NDI) მხარდაჭერით და დიდი ბრიტანეთის მთავრობის UK AID-ის ფინანსური ხელშეწყობით განხორციელდა.