საპარლამენტო ფრაქციებმა „ლელო" - პარტნიორობა საქართველოსთვის“ და „შარლ მიშელის რეფორმების ჯგუფმა“, ნატოში გაწევრიანებასთან დაკავშირებით, ინტერფრაქციულ საპარლამენტო მემორანდუმს ხელი მოაწერეს.

„შარლ მიშელის რეფორმების ჯგუფის“ ერთ-ერთი ლიდერის, გიორგი ვაშაძის განცხადებით, მემორანდუმი ასევე ეხება უკრაინის ნატოში გაწევრიანებას. მისი თქმით, მემორანდუმზე ხელმომწერები უკრაინულ მხარესთან გამართავენ მოლაპარაკებებს ერთობლივი სამოქმედო გეგმის შემუშავების მიზნით, რათა საქართველოს და უკრაინის ხმა უფრო მკაფიოდ ისმოდეს.

„ეს არ არის მარტივი პროცესი, მაგრამ როდესაც ერთ ადგილზეა გაყინული ნატოში ინტეგრაციის პროცესი, ჩვენი, როგორც პოლიტიკოსების, საქართველოს მოქალაქეების პასუხისმგებლობა და ვალდებულებაა არჩევანს, რომელიც გააკეთა ქართველმა ხალხმა ნატოს მიმართულებით, მაქსიმალური ფორსირება გავუკეთოთ და კონკრეტული ნაბიჯები გადავდგათ“, - განაცხადა გიორგი ვაშაძემ.

ფრაქციის „ლელო“ - პარტნიორობა საქართველოსთვის“ თავმჯდომარე ბადრი ჯაფარიძეს მიაჩნია, რომ ეს შეთანხმება, დეკლარაციებისგან განსხვავებით, რეალურ შედეგს გამოიღებს, რაც დააჩქარებს ჩვენი ქვეყნის ინტეგრაციას ევროატლანტიკურ სტრუქტურებში.

„ჩვენი მიზანია, ასევე, უკრაინელ პარტნიორებთან ერთად გავაერთიანოთ ძალისხმევა იმისათვის, რომ ჩვენმა ქვეყნებმა, რომლებსაც ერთი და იგივე გამოწვევები აქვთ, მოახერხონ, რომ დაჩქარდეს ჩვენი ქვეყნების გაწევრება ევროატლანტიკურ სტურქტურებში და, ამ მხრივ, ჩვენი ძალისხმევის გაერთიანება უკრაინელ კოლეგებთან მხოლოდ შეუწყობს ხელს ამ პროცესს“, - განაცხადა ბადრი ჯაფარიძემ.

მემორანდუმზე ხელმომწერი მხარეები აცხადებენ, რომ პროცესი ღია და გახსნილი იქნება ყველასთვის, მოიწვევენ ქართველ და უკრაინელ დეპუტატებს, ასევე ნატოს წევრი ქვეყნების, სამოქალაქო საზოგადოებისა და აკადემიური წრეების წარმომადგენლებს.

ფრაქციები მემორანდუმის მიზნების და ამოცანების შესასრულებლად ფართომასშტაბიან ღონისძიებებს გეგმავენ, მათ შორის, საპარლამენტო დონეზე ერთობლივი სამოქმედო გეგმის შემუშავებას.

ასევე განახორციელებენ საპარლამენტო ზედამხედველობას აღმასრულებელ ხელისუფლებაზე, რათა უზრუნველყოფილი იყოს ნატოს სტანდარტების შესრულება ჩვენი ქვეყნების დემოკრატიული განვითარების, კანონის უზენაესობისა და თავდაცვის სფეროში საქართველოსა და უკრაინის ნატოსთან თავსებადობის დონის ასამაღლებლად.