ვანის რაიონში, ბიოლოგიურ მეურნეობათა ასოციაცია „ელკანამ“, კოოპერატივებს ,,ძულუხი" და ,,ბუმერანგი777“, თხილის წარმოებისთვის საჭირო ინვენტარი და ორი მიკროავტობუსი გადასცა. კოოპერატივი ,,ძულუხი" დაფინანსებულ იქნა 36 000 ლარით, ხოლო კოოპერატივი ,,ბუმერანგი 777" 42 000 ლარით.

ინვენტარის გადაცემას ფრაქცია „ქართული ოცნების“ წევრი, აგრარულ საკითხთა კომიტეტის წევრი დათო ლორთქიფანიძე ესწრებოდა, რომელმაც ფერმერებს მხარდაჭერა გამოუცხადა. შეხვედრას, აგრეთვე ესწრებოდნენ ვანის მუნიციპალიტეტის ხელძღვანელობა და საქართველოს სოფლის მეურნეობის სამინისტროს ვანის მუნიციპალიტეტის საინფორმაციო საკონსულტაციო სამსახურის უფროსი, ივანე სანადირაძე.

ფერმერებს დახმარება გაეწიათ პროექტის ფარგლებში, რომელსაც ახორციელებენ შვეიცარიული არასამთავრობო ორგანიზაცია HEKS/EPER-ი, შვეიცარიული კომპანიები „სვის კრედიტი“ და „ანკა ფეარ თრეიდი“ ბიოლოგიურ მეურნეობათა ასოციაცია „ელკანას“-თან თანამშრომლობით. პროექტის მიზანია მცირე ფერმერთა ფინანსური მხარდაჭერა, სამართლიანი ვაჭრობისა და ბიოთხილის წარმოების ღირებულების ჯაჭვის შექმნის პროცესში მათი ჩართულობა.

ქვეყანაში რეგისტრირებული 1121 კოოპერატივიდან, ვანის რაიონში 25 კოოპერატივია რეგისტრირებული, მათ შორის 1 კოოპერატივი (,,თაფლი საჩინო") მეორე დონისაა. სულ, ვანის რაიონში, ექვს საგრანტო პროგრამაში გამარჯვებული კოოპერატივი ფუნქციონირებს.