პარლამენტმა მესამე მოსმენით განიხილა და 76 ხმით მიიღო კანონპროექტი „მაუწყებლობის შესახებ“ საქართველოს კანონში ცვლილების შეტანის თაობაზე“.

პროექტის ერთ-ერთი ინიციატორის, რატი იონათამიშვილის განცხადებით, ცვლილებებით წესრიგდება საზოგადოებრივ მაუწყებელთან დაკავშირებული მთელი რიგი სამართლებრივი ურთიერთობები.

კერძოდ, განისაზღვრება საზოგადოებრივი მაუწყებლის საქმიანობასთან, მის დაფინანსებასთან, მისი ხელმძღვანელი ორგანოების დაკომპლექტებასა და ამ ორგანოთა უფლებამოსილებებთან დაკავშირებული საკითხები.

აღმოიფხვრება საზოგადოებრივი მაუწყებლის ინსტიტუციურ მოწყობასა და საქმიანობასთან დაკავშირებული საკითხების მომწესრიგებელი ცალკეული საკანონმდებლო ნორმების შინაარსობრივი ხარვეზები.

კანონპროექტის თანახმად, 9-დან 11-მდე იზრდება საზოგადოებრივი მაუწყებლის სამეურვეო საბჭოს წევრთა რაოდენობა, საიდანაც სამ კანდიდატს წარადგენს აჭარის ა/რ უმაღლესი საბჭო. ასევე, აჭარის მაუწყებლის მრჩეველთა საბჭო გაერთიანდება საზოგადოებრივი მაუწყებლის სამეურვეო საბჭოსთან.

სამეურვეო საბჭოს თავმჯდომარისა და თავმჯდომარის მოადგილის უფლებამოსილების ვადები იზრდება 3 წლიდან 6 წლამდე.

პროექტით იცვლება საზოგადოებრივი მაუწყებლის გენერალური დირექტორობის კანდიდატის საკვალიფიკაციო მოთხოვნები.

საზოგადოებრივ მაუწყებელს ეკისრება ვალდებულება, რომ საქართველოს სახელმწიფო ბიუჯეტიდან მიღებული ასიგნებების არანაკლებ 10%-ის ოდენობით, ქართული მხატვრული ტელეფილმების, ქართული დოკუმენტური ტელეფილმებისა და ქართული ტელესერიალების დაფინანსების მიზნით მიმართოს.

ასევე, იზრდება საზოგადოებრივი მაუწყებლის აჭარის ტელევიზიისა და რადიოს დაფინანსების ოდენობა.