პარლამენტმა, პლენარულ სხდომაზე, პირველი მოსმენით, დაჩქარებული წესით განიხილა და 80 ხმით მხარი დაუჭირა კანონპროექტს „ადმინისტრაციულ საპროცესო კოდექსში“ ცვლილების შეტანის შესახებ“.

კანონპროექტით, „ადმინისტრაციულ საპროცესო კოდექსს“ ემატება ახალი თავი, რომელიც კომუნიკაციების ეროვნული კომისიის მიერ კომერციული ბანკისგან, მიკრობანკისგან მაუწყებლის შესახებ კონფიდენციალური ინფორმაციის მოპოვების თაობაზე ადმინისტრაციულ სამართალწარმოებას შეეხება.

„საქართველოს პარლამენტმა საგაზაფხულო სესიის მიმდინარეობის დროს „მაუწყებლობის შესახებ“ კანონში ცვლილება შეიტანა, რომლის თანახმადაც, მაუწყებლებს აღარ აქვთ შესაძლებლობა უცხოეთიდან, უცხოური ძალისგან პირდაპირი ან არაპირდაპირი გზით დაფინანსება მიიღონ, რასაც თავისი დასაბუთება აქვს. ამის მიზანი იყო, რომ საზოგადოება გავლენებისგან იყოს დაცული და მხოლოდ და მხოლოდ ფაქტების შესახებ მიიღოს ინფორმაცია. იმისათვის, რომ კომუნიკაციების კომისიას შესაძლებლობა ჰქონდეს ეფექტური მექანიზმის გამოყენებით გადაამოწმოს იღებენ თუ არა მაუწყებლები უცხოეთიდან დაფინანსებას, იმისათვის რომ არც ერთ პირს არ გაუჩნდეს სურვილი და ცდუნება კანონის გვერდის ავლით მიიღოს ამგვარი დაფინანსება, კომუნიკაციების კომისიას შესაძლებლობა ექნება მიმართოს სასამართლოს და სასამართლოს წესით გამოითხოვოს შესაბამისი ინფორმაცია ჩარიცხვებისა და კონკრეტული გადარიცხვების თაობაზე.
პირველი ინსტანციის სასამართლო გადაწყვეტილებას 14 დღის ვადაში მიიღებს. მხარეს შესაძლებლობა ექნება მიღებული გადაწყვეტილება 48 საათის განმავლობაში გაასაჩივროს, ხოლო სააპელაციო წესით სასამართლოში განხილვა და გადაწყვეტილების მიღება 10 დღის ვადაში მოხდება“, - განაცხადა იურიდიულ საკითხთა კომიტეტის თავმჯდომარემ არჩილ გორდულაძემ.

მისივე თქმით, ამავდროულად, სახდელის დადების თაობაზე კომუნიკაციების კომისიის მიერ მიღებული გადაწყვეტილება თუ სასამართლოში გასაჩივრდა, ეს ამ აქტის მოქმედებას არ გააჩერებს, გარდა იმ შემთხვევისა, თუ მიღებულია გადაწყვეტილება ავტორიზაციის შეჩერების თაობაზე.

„ამავდროულად, პირთა უფლებების დაცვა კვლავ უზრუნველყოფილია სამართლიანი სასამართლოს პრინციპიდან გამომდინარე, რადგან მხარეს აქვს შესაძლებლობა სარჩელის უზრუნველყოფის სახით მოითხოვოს აქტის მოქმედების შეჩერება შესაბამისი დასაბუთების შემთხვევაში“, - აღნიშნა არჩილ გორდულაძემ.