პარლამენტში ახალშექმნილ კულტურის კომიტეტში წევრთა რაოდენობა არანაკლებ 10 დეპუტატით განისაზღვრა. ამის შესახებ კომიტეტის სხდომაზე საპროცედურო საკითხთა და წესების კომიტეტის თავმჯდომარის მოადგილემ, გურამ მაჭარაშვილმა განაცხადა.

მისი თქმით, გუშინ საქართველოს პარლამენტმა მიიღო დადგენილება, რომლის მიხედვითაც პარლამენტში მე-16, კულტურის კომიტეტი შეიქმნება, შესაბამისად, საპროცედურო საკითხთა და წესების კომიტეტმა, რეგლამენტის მიხედვით კომიტეტის წევრთა რაოდენობა და პროპორციული წარმომადგენლობის კვოტები ასე განსაზღვრა, კომიტეტში იქნება არანაკლებ 10 წევრი, მათგან ექვსი უმრავლესობის, ოთხი ოპოზიციის წარმომადგენელი.

კომიტეტის წევრებმა მხარი დაუჭირეს საკითხს. შესაბამის სამართლებრივ დასკვნას კომიტეტი პარლამენტის ბიუროს გადაუგზავნის.

საპროცედურო საკითხთა და წესების კომიტეტმა დღევანდელ სხდომაზე ასევე განიხილა „საქართველოს კონსტიტუციაში“ ცვლილების შეტანის შესახებ“ საქართველოს კონსტიტუციური კანონის პროექტის წარდგენის უფლების განხორციელების მიზნით, საქართველოს მოქალაქეთა საინიციატივო ჯგუფის მიერ 200 000 ხელმოწერის შეგროვების მიზანშეწონილობის საკითხი. როგორც მომხსენებელმა, გურამ მაჭარაშვილმა განაცხადა, კომიტეტის აპარატმა შეისწავლა წარმოდგენილი განაცხადი და თანდართული დოკუმენტაცია, რის შემდეგაც მიზანშეწონილად მიიჩნია საინიციატივო ჯგუფს გადასცეს შესაბამისი ფორმები 200 000 ხელმოწერის შესაგროვებლად.

პარლამენტის რეგლამენტის შესაბამისად საინიციატივო ჯგუფს 4 თვე ეძლევა საჭირო ხელმოწერების შესაგროვებლად. ხოლო მათი წარმოდგენის შემდეგ, რაც კომიტეტის აპარატი გადაამოწმებს ხელმოწერების ნამდვილობას, პარლამენტში მოხდება საკანონმდებლო ცვლილების ინიცირება.

კომიტეტმა ამ საკითხსაც ერთხმად დაუჭირა მხარი.