პარლამენტის წევრმა, N43 მაჟორიტარული ოლქის დეპუტატმა, სიმონ ნოზაძემ ხაშურის მუნიციპალიტეტის სოფლებში მიმდინარე ინფრასტრუქტურული პროექტები დაათვალიერა და ადგილობრივ მოსახლეობას შეხვდა. დაბა სურამის და სოფელ ქვიშხეთის მოსახლეობასთან შეხვედრისას, მაჟორიტარი დეპუტატი მათ საჭიროებებს გაეცნო და დახმარება აღუთქვა.

სიმონ ნოზაძემ მუნიციპალიტეტის თანამშრომლებთან ერთად, მაღალმთიანი სოფლის სტატუსის მქონე სოფელ ცედანში გაზის მაგისტრალის მშენებლობა და სოფლის სასმელი წყლით უზრუნველსაყოფად ჩატარებული სამუშაოები დაათვალიერა. ადგილობრივმა მოსახლეობამ მაჟორიტარ დეპუტატს განხორციელებული პროექტებისთვის მადლობა გადაუხადა და აღნიშნეს, რომ ბუნებრივი აირით და წყლით უზრუნველყოფა ხელს შეუწყობს სოფლიდან წასული მოსახლეობის უკან დაბრუნების პროცესს და სოფლის ცხოვრებას ახალ ეტაპზე აიყვანს. ადგილობრივმა მოსახლეობამ პარლამენტის წევრს გარე განათების და გზის რეაბილიტაციის თხოვნით მიმართა, რაზეც სიმონ ნოზაძე, მუნიციპალიტეტის ჩართულობით, დახმარებას დაპირდა. სოფელ ცედანის გაზიფიცირების და თითოეულ ოჯახისთვის სასმელი წყლით უზრუნველყოფის საკითხები წლის ბოლომდე დასრულდება.