საპარლამენტო ფრაქცია „ქართული ოცნება – მრეწველების“ თავმჯდომარემ, ხაშურის მაჟორიტარმა დეპუტატმა სიმონ ნოზაძემ, საფრანგეთში, ლევილის ქართულ მამულში საქართველოს 1924 წლის ეროვნული აჯანყების 94-ე წლისთავისადმი მიძღვნილ ღონისძიებაში მიიღო მონაწილეობა. 

პარიზის ქართული სათვისტომოს მიერ გამართული ღონისძიების ფარგლებში, ქართული პოლიტიკური ემიგრაციის ცნობილი მოღვაწის, ვიქტორ ნოზაძის დაბადებიდან 125 წლისთავიც აღნიშნეს და დაღუპულთა სულის მოსახსენიებელი პანაშვიდიც გადაიხადეს. როგორც სიმონ ნოზაძემ აღნიშნა, აჯანყების ტრაგიკული ფურცლის გახსენება ყოველთვის ამაღელვებელია.

„ჩვენი წინაპრების ტკივილიანი ისტორიის მქონე პატარა სოფელ ლევილში ორი ღირსშესანიშნავი მოვლენის მონაწილეობა უდიდესი ბედნიერებაა. 1924 წლის აჯანყება იყო ერთ-ერთი ყველაზე ტრაგიკული ფურცელი საქართველოს ისტორიაში და ამასთანავე, ეს იყო ყველაზე კარგად მომზადებული, ორგანიზებული სამხედრო გამოსვლა. რუსულმა სპეცსამსახურმა ყველაფერი გააკეთა, რომ ეს გამოსვლა წარუმატებლად დასრულებულიყო. როცა არქივები გაიხსნა და არა ერთი დოკუმენტი გამოვლინდა, მათ შორის იყო დოკუმენტი, რომელიც 1924 წლის აჯანყებას ეძღვნება. ამის შედეგად, ბევრ რამეს აეხადა ფარდა. მიუხედავად იმისა, რომ აჯანყება გაყიდული იყო, ის მაინც დაიწყეს. ბედნიერი ვარ, რომ შევიკრიბეთ ლევილის აწ უკვე ქართულ მამულში და აჯანყების მონაწილეებს 94-ჯერ მივაგეთ პატივი“, - მიმართა ღონისძიების მონაწილეებს დეპუტატმა.

ღონისძიებებს დევნილი მთავრობისა და მაშინდელი სხვადასხვა პარტიის წევრთა შთამომავლები, ახალი თაობის ემიგრანტები, საქართველოს საგარეო საქმეთა სამინისტროსა და საელჩოს წარმომადგენლები დაესწრნენ.