სუვერენიტეტის და ტერიტორიული მთლიანობის თემის განხილვას დაეთმო პარლამენტის თბილისის სასახლეში მიმდინარე ამბასადორიალის ერთ-ერთი სესია, რომელზეც მოხსენებებით პარლამენტის საგარეო ურთიერთობათა კომიტეტის თავმჯდომარე, სოფიო ქაცარავა, პარლამენტის ტერიტორიული მთლიანობის აღდგენის საკითხთა დროებითი კომისიის თავმჯდომარე, გედევან ფოფხაძე, სახელმწიფო მინისტრი, ქეთევან ციხელაშვილი და სახელმწიფო უსაფრთხოების სამსახურის უფროსის მოადგილე, ალექსანდრე ტაბატაძე წარსდგნენ.

მომხსენებლებმა საქართველოს დიპლომატიური კორპუსის წარმომადგენლებთან რუსეთ-საქართველოს კონფლიქტის მშვიდობიანი დარეგულირების პროცესში საერთაშორისო თანამეგობრობის როლზე, საქართველოს ოკუპირებულ რეგიონებში არსებულ ვითარებასა და შერიგების პოლიტიკის პროცესში მიღწეულ შედეგებსა და სამომავლო გეგმებზე ისაუბრეს.

საგარეო ურთიერთობათა კომიტეტის თავმჯდომარემ, გამოსვლის დასაწყისში, საგარეო პოლიტიკის განსაზღვრის საკითხებში საკანონმდებლო ორგანოს როლის მნიშვნელობა აღნიშნა და ამბასადორიალის პარლამენტში გამართვის სიმბოლურ დატვირთვაზე ისაუბრა.

სოფიო ქაცარავამ თავის გამოსვლაში ყურადღება ბოლო წლებში ხელისუფლების მხრიდან გატარებული საგარეო პოლიტიკის მიმართულებებზე გაამახვილა და აღნიშნა, რომ უსაფრთხოებისა და სტაბილურობის კუთხით, ქვეყანა პრაგმატულ და დაბალანსებულ პოლიტიკას ახორციელებს და აღნიშნულ მიდგომებს ალტერნატივა არ აქვს. 

„მიუხედავად ასეთი დაბალანსებული პოლიტიკისა, სამწუხაროდ, ვხედავთ რომ რუსეთის აგრესია გრძელდება და საქართველოს ტერიტორიის ნაწილი, აფხაზეთის და ცხინვალის რეგიონი კვლავაც რუსეთის ოკუპაციის ქვეშ რჩება. რუსეთის მხრიდან ქვეყნის შიდა პოლიტიკაში აგრესიული ჩარევა გრძელდება, რაც ცალსახად მიუღებელია. სწორედ ასეთ ფონზე, როდესაც ადგილი აქვს რუსეთის მხრიდან პროვოკაციულ ქმედებებს და აგრესიას, დიდი მნიშვნელობა ენიჭება საერთაშორისო მხარდაჭერას. მიუხედავად არსებული გამოწვევებისა, ჩვენ გვაქვს ხელშესახები შედეგი, რასაც ორმხრივი და მრავალმხრივი ფორმატის შეხვედრებზე ვისმენთ. ბოლო თვეების განმავლობაში ჩვენი პარტნიორების მხრიდან, არაერთი რეზოლუცია იქნა მიღებული, სადაც საქართველოს მხარდამჭერი გზავნილები აისახა. ჩვენ ვიყენებთ ყველანაირ ბერკეტს და მექანიზმს იმისათვის, რომ რუსეთ-საქართველოს კონფლიქტი და დეოკუპაციის თემა მაღალ დონეზე იყოს წამოწეული, ეს კი როგორც საპარლამენტო ასევე აღმასრულებელი ხელისუფლების ერთობლივი ძალისხმევის შედეგია“, - განაცხადა სოფიო ქაცარავამ. 

კომიტეტის თავმჯდომარე ეუთოს საპარლამენტო ასამბლეის მიერ მიღებულ დეკლარაციასაც შეეხო და აღნიშნა, რომ ქართული დელეგაციის ძალისხმევის შედეგად, ეუთოს საპარლამენტო ასამბლეის ყოველწლიურ სესიაზე, მინსკის საბოლოო დეკლარაციაში რუსეთის ქმედებებზე და საქართველოს ოკუპირებულ ტერიტორიებზე არსებულ ვითარებაზე საკმაოდ მკაცრი ჩანაწერი გაკეთდა. „ჩვენ გვაქვს საინტერესო გეგმები, რაც საერთაშორისო საზოგადოების მობილიზებას და ეუთოს ფარგლებში თანამშრომლობას შეეხება“, - აღნიშნა სოფიო ქაცარავამ.

პარლამენტის დროებითი კომისიის საქმიანობაზე და ტერიტორიული მთლიანობის აღდგენის კუთხით საკანონმდებლო ბაზის მიმოხილვას დაეთმო კომისიის თავმჯდომარის, გედევან ფოფხაძის გამოსვლა.

ჟენევის სამშვიდობო მოლაპარაკებების მნიშვნელობაზე, საოკუპაციო ხაზებით გაყოფილ მოსახლეობას შორის ნდობის აღდგენისა და შერიგების პოლიტიკის პროცესში არსებულ ვითარებაზე ისაუბრეს აღნიშნული პანელის სხვა მომხსენებლებმა. გამომსვლელებმა დიპლომატიური კორპუსის წარმომადგენლების შეკითხვებსაც უპასუხეს და მათთვის საინტერესო თემებზე დამატებითი განმარტებები გააკეთეს.