პარლამენტის თავმჯდომარის მოადგილე ირმა ინაშვილი საქართველოში ნიდერლანდების სამეფოს ელჩს, იოჰანეს დაუმას შეხვდა. შეხვედრაზე მხარეებმა საპრეზიდენტო არჩევნების მეორე ტურის წინ არსებული საარჩევნო გარემო მიმოიხილეს და დემოკრატიული და სამართლიანი არჩევნების ჩატარების მნიშვნელობაზე ისაუბრეს.

ირმა ინაშვილმა ჰოლანდიელ დიპლომატს 25 ნოემბერს „საქართველოს პატრიოტების“ მიერ ორგანიზებული მრავალათასიანი აქციის გამართვის თაობაზე ინფორმაცია მიაწოდა და აღნიშნა, რომ აქციაზე შეკრებილმა მოსახლეობამ მკაფიო გზავნილით არჩევნების მეორე ტურში მონაწილეობის მიღება დააფიქსირა.

„შეხვედრაზე ვისაუბრეთ საინფორმაციო და საარჩევნო კამპანიაზე. საარჩევნო პერიოდში საინფორმაციო პოლიტიკის გაჯანსაღების მიზნით, საქართველოს პატრიოტებმა შესაძლოა საკანონმდებლო ცვლილებების პაკეტი შევიტანოთ, ამის შესახებ ელჩს მივაწოდეთ ინფორმაცია. შეხვედრაზე დიპლომატს ფრაქციის მიერ მომზადებული რეზოლუციის პროექტიც გავაცანით, რომელიც „სააკაშვილი-ბოკერიას“ მმართველობის დანაშაულებრივ რეჟიმად გამოცხადებას შეეხება და რომელზეც 300 ათასი მოქალაქის ხელმოწერა არსებობს“, - განაცხადა ირმა ინაშვილმა შეხვედრის დასრულების შემდეგ.