ფრაქცია „ქართული ოცნების“ თავმჯდომარემ, გიორგი ვოლსკიმ და დიასპორისა და კავკასიის საკითხთა კომიტეტის თავმჯდომარემ, თეიმურაზ ჭკუასელმა პარლამენტში სტუმრად მყოფ ბავშვთა ქართული ცეკვის ანსამბლ „ენგურის“ წევრებთან გამართეს შეხვედრა. 

ანსამბლი „ენგური“ 2016 წლის თებერვალში, ესპანეთში გამართულ ხელოვნების საერთაშორისო ფესტივალზე “Folk Festival in Catalonia”, გრან-პრის მფლობელი გახდა.

შეხვედრას ანსამბლის წევრებთან ერთად, მარნეულის მუნიციპალიტეტის გამგებელი და არასამთვრობო ორგანიზაცია „ქალთა თანადგომის“ წარმომადგენლები ესწრებოდნენ.

შეხვედრაზე საქართველოში ეროვნებათაშორის ურთიერთობების და ხალხთა მეგობრობის მნიშვნელობაზე ისაუბრეს.
როგორც შეხვედრაზე დიასპორისა და კავკასიის საკითხთა კომიტეტის თავმჯდომარემ, თეიმურაზ ჭკუასელმა აღნიშნა, განსაკუთრებით სასიამოვნო და მნიშვნელოვანია ის ფაქტი, რომ ანსამბლის წევრების უმრავლესობა აზერბაიჯანელი ეროვნების ბავშვები არიან, ასევე ანსამბლში ირიცხებიან სომეხი და ქართველი ბავშვებიც. „კულტურა და ხელოვნება ეროვნებათაშორის ინტეგრაციის საუკეთესო საშუალებაა და სასიხარულოა, რომ ჩვენმა აზერბაიჯანელმა მოზარდებმა სწორედ ქართული ცეკვით წარმოაჩინეს კულტურული ინტეგრაციის შედეგი თავისი საუკეთესო გამოვლინებით“, - განაცხადა თეიმურაზ ჭკუასელმა.

ფრაქცია „ქართული ოცნების“ თავმჯდომარემ ანსამბლის წევრებს წარმატება მიულოცა და ქალაქ მარნეულის მუნიციპალიტეტის გამგეობას, არასამთავრობო ორგანიზაცია „ქალთა თანადგომას“ ანსამბლ „ენგურის“ ესპანეთში გამგზავრების ორგანიზებისთვის და საქართველოს სამეფო სახლის მეთაურს, დავით ბაგრატიონ-მუხრანბატონს პროექტის განხორციელების მხარდაჭერისთვის მადლობა გადაუხადა. „გილოცავთ, ჩვენს სასახელო მოზარდებს, ლორეტ დე მარის ხელოვნების საერთაშორისო ფესტივალის გრან-პრის მოპოვებას. განსაკუთრებით აღსანიშნავია, რომ ანსამბლ „ენგურის“ წევრთა უმრავლესობას ჩვენი აზერბაიჯანელი თანამემამულეები შეადგენენ, რომლებმაც ქართველ მოზარდებთან ერთად, ქართული ცეკვების უზადო შესრულებითა და დიდი ემოციით შეძლეს მეტად ავტორიტეტული ჟიურის სიმპატიის დამსახურება“, -აღნიშნა გიორგი ვოლსკიმ.

შეხვედრაზე ანსამბლს სამახსოვრო საჩუქარი გადაეცა. სტუმრებისთვის პარლამენტის შენობაში საექსკურსიო ტური მოეწყო.