ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველი მოადგილე გედევან ფოფხაძე დღეს ადვოკატ გიორგი მდინარაძეს შეხვდა. შეხვედრაზე, რომელსაც იურიდიული დახმარების სამსახურის ხელმძღვანელი, მელიტონ ბენიძე ესწრებოდა, საუბარი შეეხო პოლიციის განყოფილებაში ადვოკატის ცემის ფაქტს.

როგორც გედევან ფოფძაძემ განაცხადა, ამ შეხვედრას, რომელიც კომიტეტის ინიციატივით გაიმართა, წინ უძღოდა ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის ეკა ბესელიას გამოსვლა პარლამენტის პლენარულ სხდომაზე, სადაც მან კომიტეტის საერთო პოზიცია გამოხატა მომხდართან დაკავშირებით.

ეკა ბესელიას განცხადებით, „იმ ფონზე, როდესაც მიმდინარე რეფორმებთან დაკავშირებით საქართველო მაღალ შეფასებებს იღებს, ადვოკატის ცემის ფაქტი საჭიროებს სწრაფ, ობიექტურ გამოძიებას და კომიტეტი მონიტორინგს გაუწევს ამ საქმეს“.

თავის მხრივ გედევან ფოფხაძემ კიდევ ერთხელ დაადასტურა, რომ მომხდარი აბსოლუტურად მიუღებელი ფაქტია და ადვოკატის პროფესიის დაცვა სახელმწიფოსათვის არის სტრატეგიულად მნიშვნელოვანი. „აქ არა მარტო კონკრეტული ადამიანის დაცვის პრობლემაა, რომლის მიმართაც ძალადობა განხორციელდა. ადვოკატი არის ისეთი პროფესია, რომელმაც უნდა უზრუნველყოს ადამიანის უფლებების ქმედითად დაცვა და თუ თავად ადვოკატის პროფესია არ იქნება დაცული, მაშინ საერთოდ უფლებების დაცვაზე საუბარი ძალიან გაგვიჭირდება“, - განაცხადა გედევან ფოფხაძემ.

მისი თქმით, იმ ფონზე, როდესაც სისტემაში სერიოზულ რეფორმებს ახორციელებენ და მისი გაუმჯობესებისათვის სისტემური თვალსაზრისით ბევრი რამ უკვე გაკეთდა, „ასეთი ფაქტი ძალიან სერიოზულ პრობლემას ქმნის და, შესაბამისად, ამ ფაქტზე რეაგირებაზე მნიშვნელოვნად იქნება დამოკიდებული პოლიტიკური გზავნილი საზოგადოებისათვის“.

„თუ დაისჯება ყველა დამნაშავე, თუ ობიექტური, ოპერატიული და ადეკვატური ძიება ჩატარდება, თავისი შესაბამისი სამართლებრივი შედეგით, მიმაჩნია, რომ ამ შემთხვევაში სახელმწიფო ჩააბარებს გამოცდას. თუკი რაიმე კითხვის ნიშანი დარჩა, ეს იქნება გამოწვევა ჩვენთვის სამომავლოდ. ამიტომ, არ უნდა შევუქმნათ ვინმეს ილუზია, რომ ადვოკატზე განახორციელებს ძალადობას და ეს მას შერჩება. ეს იქნება ძალიან კარგი პრეცედენტი და მაგალითი იმისათვის, რომ სახელმწიფომ ეს გზავნილი ყველასათვის გააკეთოს“, - განაცხადა კომიტეტის თავმჯდომარის პირველმა მოადგილემ.
გედევან ფოფხაძის განცხადებით, ფაქტზე სწორი პოლიტიკური შეფასება უნდა გაკეთდეს და დადგინდეს სიმართლე, რათა მომავალში სხვებსაც არ გაუჩნდეს მსგავსი გზით სიარულის მოტივი და სურვილი.

„ჩვენთვის მნიშვნელოვანია პარლამენტის მხარდაჭერა და ველოდებით მომხდარზე სწორ რეაგირებას“, - განაცხადა შეხვედრის შემდეგ ადვოკატმა გიორგი მდინარაძემ.