„ერთიანი ნაციონალური მოძრაობა“ - გაერთიანებული ოპოზიცია „ძალა ერთობაშია“ ფრაქციის წევრი ანა წითლიძე ახალგაზრდული პარლამენტის წევრებს შეხვდა.

ანა წითლიძე სხვადასხვა უმაღლესი სასწავლებლის სტუდენტებს ესაუბრა ევროკავშირის მიერ განსაზღვრულ 12 - პუნქტიან გეგმაზე, მის მნიშვნელობაზე და ამ მიმართულებით პარლამენტის საქმიანობაზე, ქვეყნის საგარეო პრიორიტეტებზე, რეგიონული უსაფრთხოების საკითხებზე, რუსეთიდან მომდინარე ჰიბრიდულ საფრთხეებზე, მედიაგარემოზე, ქვეყანაში მიმდინარე პოლიტიკურ პროცესებზე, გენდერული თანასწორობის საკითხებზე და ფრაქციის საკანონმდებლო ინიციატივებზე. დეპუტატმა ახალგაზრდული პარლამენტის წევრების შეკითხვებსაც უპასუხა.

„ვფიქრობ, რომ რაც უფრო მეტი სტუდენტი გაეცნობა როგორ მუშაობს პარლამენტი, როგორია საკანონმდებლო საქმიანობა და რაც უფრო მეტად დაინტერესდება პოლიტიკით, მით უკეთესი იქნება ამ ქვეყნის განვითარებისთვის, განსაკუთრებით ახლა, როდესაც პარლამენტი მუშაობს ისეთ მნიშვნელოვან საკითხზე, როგორიც არის 12-პუნქტიანი გეგმა. ვთვლი, რომ ხელისუფლებაც და ოპოზიციაც უნდა ელაპარაკოს ყველას, განსაკუთრებით ახალგაზრდებს, ახალ თაობას, ვინც ამ ქვეყნის ხვალინდელი დღეა, რატომ არის მნიშვნელოვანი, რომ ჩვენმა ქვეყანამ მიიღოს ევროკავშირის კანდიდატის სტატუსი და რა უნდა გავაკეთოთ ყველამ ერთად იმისთვის, რომ ეს 12 პუნქტი შესრულდეს. რაც ყველაზე მთავარია, ძალიან ბევრი უნდა ველაპარაკოთ ამ თაობას იმაზე, თუ რატომ არის ევროპა ჩვენი ისტორიული არჩევანი“, - განაცხადა ანა წითლიძემ.