საქართველოს პარლამენტის გენდერული თანასწორობის საბჭოსა და ეროვნულ-დემოკრატიული ინსტიტუტის (NDI) ორგანიზებით ბათუმის, ქობულეთისა და ხელვაჩაურის საკრებულოების და აჭარის უმაღლესი საბჭოს გენდერული თანასწორობის საბჭოებთან საინფორმაციო სახის სამუშაო შეხვედრა გაიმართა. 

შეხვედრას პარლამენტის გენდერული თანასწორობის საბჭოს წევრი დიმიტრი ცქიტიშვილი გაუძღვა, რომელმაც საბჭოს საქმიანობასა და იმ აქტივობების შესახებ ისაუბრა, რაც 2018-2020 წლების სამოქმედო გეგმის ფარგლებში განხორციელდა. დეპუტატმა მიმოიხილა: ქალთა პოლიტიკური ჩართულობის გაზრდის, ქალთა ეკონომიკური გაძლიერების, სექსუალური შევიწროების, გენდერული ბიუჯეტირების, ანაზღაურებებს შორის გენდერული სხვაობის საკითხები. მან ასევე დამსწრე საზოგადოებას გააცნო საბჭოს სამომავლო გეგმები და ყურადღება გაამახვილა იმ კანონპროექტებზე, რომლებიც საქართველოს პარლამენტში ამ ეტაპზე განიხილება.

შეხვედრაზე განიხილეს შესაძლო დამატებითი მექანიზმები, რომლებიც ადგილობრივ თვითმმართველობებს უფრო გააქტიურებისა და ამ პროცესში ჩართვის საშუალებას მისცემს. დეპუტატი დეტალურად გაეცნო მუნიციპალიტეტის საბჭოების წინაშე არსებულ გამოწვევებსა და საჭიროებებს. 

სამუშაო შეხვედრას ასევე ესწრებოდნენ: გენდერული თანასწორობის საბჭოს წევრი ენძელა მაჭავარიანი და ბათუმის მაჟორიტარი დეპუტატი - ფატი ხალვაში

აღნიშნული ღონისძიება ეროვნულ-დემოკრატიული ინსტიტუტის (NDI) მხარდაჭერით განხორციელდა