საგარეო ურთიერთობათა კომიტეტის თავმჯდომარის მოადგილე დიმიტრი ცქიტიშვილი საქართველოს ტექნიკური უნივერსიტეტის სამართლისა და საერთაშორისო ურთიერთობების  ფაკულტეტის სტუდენტებს შეხვდა.

ახალგაზრდებთან შეხვედრის ძირითადი თემა საგარეო პოლიტიკის მიღწევები, გამოწვევები და პერსპექტივები იყო.

დიმიტრი ცქიტიშვილმა სტუდენტებს გააცნო საგარეო ურთიერთობათა კომიტეტის საქმიანობის ძირითადი მიმართულებები, ქვეყნის საგარეო პოლიტიკის წინაშე მდგარი სტრატეგიული ამოცანები, რომელთა განხორციელებაში მნიშვნელოვანია  კომიტეტის როლი. ყურადღება დაუთმო საპარლამენტო დიპლომატიის კუთხით კომიტეტის, მთლიანად პარლამენტის  მხრიდან შესრულებულ საქმიანობას, სხვა საკითხებს.

შეხვედრა, ძირითადად, ინტერაქციულ რეჟიმში წარიმართა და დიმიტრი ცქიტიშვილმა ამომწურავად უპასუხა სტუდენტების კითხვებს.

ახალგაზრდები დაინტერესდნენ საგარეო მიმართულებით საქართველოს  გეგმებითა და მიღწევებით, საქართველოს კავშირებითა და თანამშრომლობით სხვადასხვა ქვეყნებთან, საერთაშორისო ორგანიზაციებსა და საპარლამენტო გაერთიანებებთან, ასევე ასოცირების ხელშეკრულების დღის წესრიგით განსაზღვრული ამოცანების შესრულების მდგომარეობით, საქართველოს ტერიტორიაზე არსებული კონფლიქტებითა და მათი მოგვარების გზებით და სხვა საკითხებით.

„შეხვედრა იყო ნაყოფიერი და ძალიან საინტერესო, ორმხრივად სასარგებლო. სტუდენტებს გავაცანი  ჩვენი საგარეო ურთიერთობათა კომიტეტის საქმიანობის ძირითადი მიმართულებები, ჩვენი ხელისუფლების პრიორიტეტებით განსაზღვრული საგარეო-პოლიტიკური საკითხები. ვისაუბრეთ იმაზე, თუ როგორ და რაზე ვმუშაობთ. მათგან იყო საკმაოდ საინტერესო კითხვები და  შეხვედრა, ძირითადად, ინტერაქციულ რეჟიმში წარიმართა. შევეხეთ სხვა საკითხებსაც, როგორიცაა შრომის უფლებები, შრომის უსაფრთხოების საკითხები, რომლებიც  ასევე ჩემი საქმიანობის ნაწილს წარმოადგენს. მსგავსი შეხვედრები საბოლოო ჯამში ურთიერთობის  საინტერესო ფორმატს ქმნის, იმიტომ რომ ინტერაქცია ახალგაზრდებთან, მათგან მოსმენილი კრიტიკული შენიშვნები,  ზოგადად კრიტიკა, მათგან გამოხატული პოზიციები   გვეხმარება იმაში, რომ საჭირო შემთხვევაში მოვახდინოთ იმ გზებისა და მეთოდების კორექტირება, რომლითაც ვმუშაობთ.  საინტერესოა მოვისმინოთ მათი აღქმა, თუ როგორ ხედავენ ჩვენს მუშაობას, რამდენად სწორად, რამდენად დადებითად ან უარყოფითად აფასებენ მას,  შესაბამისად,  მსგავსი შეხვედრები გვეხმარება შემდგომ მუშაობაში“, - განაცხადა დიმიტრი ცქიტიშვილმა სტუდენტებთან შეხვედრის შემდეგ.