გედევან ფოფხაძე ევროპის საბჭოს საპარლამენტო ასამბლეის მიგრაციის, ლტოლვილთა და იძულებით გადაადგილებულ პირთა კომიტეტის მომხსენებელს შეხვდა
ტერიტორიული მთლიანობის აღდგენის საკითხთა დროებითი კომისიის თავმჯდომარე გედევან ფოფხაძე საქართველოში ვიზიტად მყოფ ევროპის საბჭოს საპარლამენტო ასამბლეის მიგრაციის, ლტოლვილთა და იძულებით გადაადგილებულ პირთა კომიტეტის მომხსენებელს, კილიონ მუნიამას შეხვდა.
შეხვედრაზე მხარეებმა საქართველოში დევნილი მოსახლეობის მდგომარეობასთან დაკავშირებული საკითხები მიმოიხილეს და ჰუმანიტარული ინტერესების დაცვის თვალსაზრისით, აფხაზეთის და ცხინვალის რეგიონში ადამიანის უფლებების კუთხით არსებულ გამოწვევებზე იმსჯელეს.
„ბუნებრივია რა საკითხებიც არ უნდა გადაეჭრათ დევნილ მოსახლეობას, აქ საქართველოში, მათი უფლებების დაცვის მთავარი სტანდარტი მაინც მათი საცხოვრებელ ადგილებში დაბრუნებაა. მნიშვნელოვანია, რომ აფხაზეთში და სამხრეთ ოსეთში მცხოვრები ჩვენი თანამემამულეების უფლებები სრულად იყოს დაცული და ჩვენ ნაბიჯ-ნაბიჯ უნდა ვიაროთ იმ მიმართულებით, რათა ქვეყნის ტერიტორიული მთლიანობა აღდგეს“, - განაცხადა გედევან ფოფხაძემ შეხვედრის დასრულების შემდეგ.
ევროპის საბჭოს საპარლამენტო ასამბლეის მომხსენებელთან გამართულ შეხვედრას კომისიის წევრები - ირინე ფრუიძე და გიორგი მოსიძე დაესწრნენ. კილიონ მუნიამა დღესვე ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრს, სოზარ სუბარს შეხვდება. ვიზიტის ფარგლებში ევროპელი სტუმარი წეროვანის და თბილისის ზღვის იძულებით გადაადგილებულ პირთა დასახლებებს მოინახულებს.
