პარლამენტთან არსებულ ჰერალდიკის ეროვნულ საბჭოსა და ფინეთის ეროვნულ საბჭოს შორის ურთიერთთანამშრომლობის ფარგლებში პირველი შეხვედრა გაიმართა. საქართველოს ჰერალდიკის ეროვნული საბჭოს თავმჯდომარემ, ელდარ შენგელაიამ ფინეთის რესპუბლიკის ეროვნული არქივის გენერალური დირექტორი, ჰერალდიკის ეროვნული საბჭოს თავმჯდომარე იუსი ნუორტევა მიიღო.

ელდარ შენგელაიამ ფინელ კოლეგას ქართული ჰერალდიკის განვითარების საკითხები გააცნო და აღნიშნა, რომ საბჭოთა პერიოდში საქართველოში ჰერალდიკა საერთოდ არ არსებობდა. "ჩვენ რთული პროცესი გავიარეთ, რის შედეგადაც ახალი ქართული დროშა და გერბი მივიღეთ. პირველ ეტაპზე ჩამოყალიბდა ჰერალდიკის საბჭო, ხოლო მას შემდეგ, რაც დამტკიცდა ახალი დროშა და გერბი, პარლამენტის გადაწყვეტილებით შეიქმნა მასთან არსებული ჰერალდიკის ეროვნული საბჭო", - აღნიშნა ელდარ შენგელაიამ.

იუსი ნუორტევას განცხადებით, ფინეთში ჰერალდიკის საბჭოს ეროვნული არქივი ხელმძღვანელობს და მის საქმიანობას სპეციალური კანონი განსაზღვრავს. მისივე ინფორმაციით, ფინეთის ჰერალდიკის საბჭო აქტიურად მუშაობს როგორც ძველი ჰერალდიკური ნიშნების შესწავლაზე, ასევე თანამედროვე სახელმწიფო, რელიგიურ და სამხედრო მიმართულების ჰერალდიკაზე.

ურთიერთთანამშრომლობის ფარგლებში დაგეგმილია საქართველოს ჰერალდიკის ეროვნული საბჭოს ვიზიტი ფინეთის რესპუბლიკაში. ქართული მხარე მოლაპარაკებებს ასევე აწარმოებს ჩეხეთის და პოლონეთის ჰერალდიკის საბჭოებთან.