საქართველოს პარლამენტის თავმჯდომარის მოადგილე ილია ინჯია სხვადასხვა უნივერსიტეტის სტუდენტებს შეხვდა.

შეხვედრაზე საუბარი შეეხო განათლების სისტემის რეფორმას, დიასპორის როლს საქართველოს განვითარებაში და კონსტიტუციურ სარჩელს, რომელიც რამდენიმე პოლიტიკური პარტიის აკრძალვას შეეხება.

​„სტუდენტებთან შეხვედრაზე ვისაუბრეთ განათლების სისტემის რეფორმაზე. ხაზი გავუსვი, რომ ჩვენი მთავარი მიზანია, მომავალ თაობას ჰქონდეს შესაძლებლობა მიიღოს ხარისხიანი განათლება. სწორედ ეს არის განათლების რეფორმის მთავარი იდეა და მიზანი, რომ საქართველოში განათლების სისტემა შეესაბამებოდეს საერთაშორისო სტანდარტებს. ვიმსჯელეთ დიასპორის როლზე. განვიხილეთ, თუ რა შესაძლებლობები უნდა შეიქმნას ქვეყანაში იმისთვის, რომ დიასპორა გახდეს უფრო მჭიდროდ ჩართული საქართველოს განვითარებაში და მათი ინტელექტუალური რესურსი მაქსიმალურად იყოს გამოყენებული ჩვენი ქვეყნის კეთილდღეობისთვის. შეხვედრაზე ასევე ვისაუბრეთ იმ კონსტიტუციურ სარჩელზე, რომელიც რამდენიმე პარტიის აკრძალვის საკითხს შეეხება. ვფიქრობ, ასეთი ღია საუბარი განსაკუთრებით მნიშვნელოვანია. მინდა, დიდი მადლობა გადავუხადო ყველა სტუდენტს ჩართულობისთვის და გამოხატული ინტერესისთვის“, - აღნიშნა ილია ინჯიამ.