ირაკლი სესიაშვილი ამერიკის შეერთებული შტატების სამხედრო ატაშეს და საქართველოში თავდაცვის სფეროში თანამშრომლობის ოფისის (ODC) ხელმძღვანელს შეხვდა
თავდაცვისა და უშიშროების კომიტეტის თავმჯდომარე, ირაკლი სესიაშვილი ამერიკის შეერთებული შტატების სამხედრო ატაშეს, პოლკოვნიკ სტეფანი ბეგლის და საქართველოში თავდაცვის სფეროში თანამშრომლობის ოფისის (ODC) ხელმძღვანელს ვიცე-პოლკოვნიკ, ჯოზეფ ბილბოს შეხვდა.
მხარეებმა ისაუბრეს საქართველოსა და შეერთებულ შტატებს შორის თავდაცვის სფეროში თანამშრომლობის მიმართულებებზე. შეხვედრაზე ამერიკელმა ოფიცრებმა კომიტეტის თავმჯდომარეს აშშ-ის მიერ საქართველოში თავდაცვის სფეროში განხორციელებული პროექტების პრეზენტაცია გააცნეს.
„შეერთებული შტატები ჩვენი ქვეყნის არა მხოლოდ სტრატეგიული პარტნიორი, არამედ მთავარი მოკავშირეა, რომელიც მხარს უჭერს საქართველოში მიმდინარე დემოკრატიულ რეფორმებს და ჩვენი ქვეყნის თავდაცვის და უსაფრთხოების სისტემის გაძლიერებას. შეხვედრაზე ამერიკელმა ოფიცრებმა წარმოადგინეს ის მიმართულებები, სადაც საქართველო და შეერთებული შტატები ინტენსიურად თანამშრომლობენ და ასევე ისაუბრეს სხვადასხვა სამხედრო წვრთნების ჩატარებაზე, რომელშიც ჩართულნი არიან ამერიკელი კონსულტანტები, როგორც სამხედრო ასევე სამოქალაქო პირების სახით. შეხვედრაზე შევეხეთ იმ პროგრამებს, სადაც ამერიკული მხარე საქართველოს ფინანსურ მხარდაჭერას უწევს და აღვნიშნეთ, რომ სამხედრო სფეროში ყოველწლიური დახმარების ზრდადი ტენდენცია ქვეყნის თავდაცვისუნარიანობის გაზრდას და ნატოს სტანდარტებთან დაახლოებას მნიშვნელოვნად უწყობს ხელს“, - განაცხადა ირაკლი სესიაშვილმა.
გამართულ შეხვედრაზე მხარეებმა ქართველი სამხედროების სამშვიდობო მისიებში მონაწილეობის მნიშვნელობაც მიმოიხილეს და საქართველოს თავდაცვისუნარიანობის გაძლიერების საკითხებზე ისაუბრეს.
