ევრონესტის საპარლამენტო ასამბლეის თანათავმჯდომარეების, მაკა ბოჭორიშვილის და ანდრიუს კუბილიუსის ხელმძღვანელობით, ევრონესტის საპარლამენტო ასამბლეის ბიუროს მორიგი სხდომა ერევანში გაიმართა, რომელშიც ევროპარლამენტის წევრები და აღმოსავლეთ პარტნიორი ქვეყნების დელეგაციების ხელმძღვანელები მონაწილეობდნენ.

სხდომაზე განიხილეს აღმოსავლეთ პარტნიორობის ქვეყნებში არსებული ვითარება, იმსჯელეს რეგიონში მიმდინარე მოვლენებზე. განსაკუთრებული ყურადღება დაეთმო უკრაინის გარშემო არსებულ ვითარებას.

ევრონესტის საპარლამენტო ასამბლეის ბიურომ უკრაინის მხარდამჭერი სპეციალური განცხადება მიიღო, რომლითაც დაგმეს ოკუპირებული დონეცკისა და ლუჰანსკის ოლქების დამოუკიდებლობის აღიარება და მხარი დაუჭირეს უკრაინის სუვერენიტეტსა და ტერიტორიულ მთლიანობას.

ევრონესტის საპარლამენტო ასამბლეის ბიურო აცხადებს, რომ რუსეთის მიერ საქართველოსა და უკრაინის ტერიტორიების ნაწილის ანექსია და უკანონო ოკუპაცია, ისევე როგორც მოლდოვას რესპუბლიკის დნესტრისპირეთის რეგიონში მოუგვარებელი კონფლიქტი, რეგიონსა და მთლიანად ევროპას სერიოზულ საფრთხეს უქმნის.

ევრონესტის საპარლამენტო ასამბლეის ბიურო მოუწოდებს ევროკავშირის ინსტიტუტებს, შეინარჩუნონ ევროპული მისწრაფებების მქონე პარტნიორებისთვის ევროკავშირში გაწევრიანების ისეთივე სანდო გრძელვადიანი პერსპექტივა, როგორიც აქვს ნებისმიერ ევროპულ სახელმწიფოს ევროკავშირის ხელშეკრულების 49-ე მუხლის შესაბამისად.

ევრონესტის საპარლამენტო ასამბლეის ბიუროს შეხვედრის ფარგლებში, მაკა ბოჭორიშვილმა საქართველოში მიმდინარე პროცესებზე, ასოცირების შეთანხმების შესრულებაზე, ქვეყნის ევროკავშირში ინტეგრაციის გეგმებსა და ამ პროცესში ევროპარლამენტის მხარდაჭერის მნიშვნელობაზე ისაუბრა.

გამოსვლისას მან ხაზი გაუსვა რეგიონში უსაფრთხოების კუთხით არსებულ გამოწვევებს და რუსეთის საოკუპაციო რეჟიმების მიერ ოკუპირებულ ტერიტორიებზე ადამიანის უფლებების დარღვევის ფაქტებს.

ევრონესტის საპარლამენტო ასამბლეის მეათე ყოველწლიური პლენარული სესია, მაკა ბოჭორიშვილის და ევროპარლამენტარ ანდრიუს კუბილიუსის თანათავმჯდომარეობით, მიმდინარე წლის გაზაფხულზე გაიმართება.