განათლების, მეცნიერებისა და კულტურის კომიტეტის თავმჯდომარე მარიამ ჯაში კულტურისა და სპორტის მინისტრთან, მიხეილ გიორგაძესთან და კომიტეტის წევრებთან ერთად, სახელოვნებო უმაღლეს სასწავლებლებში ვიზიტების კვირეულის ფარგლებში, შოთა რუსთაველის თეატრისა და კინოს სახელმწიფო უნივერსიტეტის პროფესორ-მასწავლებლებსა და სტუდენტებს შეხვდა.

დეპუტატებმა უნივერსიტეტის განახლებული ინფრასტრუქტურა დაათვალიერეს. უნივერსიტეტის რექტორის, გიორგი მარგველაშვილის ინფორმაციით, სასწავლებლის შენობაში 50 წლის განმავლობაში არ ჩატარებულა სარემონტო სამუშაოები, რის გამოც სრულად იყო მწყობრიდან გამოსული ინფრასტრუქტურა. 

მარიამ ჯაშის შეფასებით, სახეზეა ძალიან დიდი ცვლილებები. „საფუძველი იმისა, რომ კიდევ უფრო მეტი სასიკეთო ცვლილება იქნება, ნამდვილად არსებობს“, - განაცხადა კომიტეტის თავმჯომარემ აუდიტორიების, სააქტო დარბაზებისა და ბიბლიოთეკის დათვალიერების შემდეგ.

„მთლიანად ხდება გადახედვა სტუდენტების დაფინანსების სისტემის. ეს ეხება არა მხოლოდ სახელოვნებო დარგს, არამედ, ზოგადად, განათლების სისტემას. ჩვენ 2250 ლარიანი ვაუჩერით ვასწავლით ინჟინრებსაც, ექიმებსაც და სხვადასხვა ჰუმანიტარული დარგის სპეციალისტებსაც, რომლებზეც შედარებით ნაკლები დანახარჯი აქვს-ხოლმე სასწავლებლებს. სამივე მიმართულებით და განსაკუთრებით კულტურის სფეროში ვითხოვ დაფინანსების გაზრდას. ყველანაირად ვეცდები, რომ წლევანდელი ნიშნული შევინარჩუნოთ და კიდევ უფრო გაიზარდოს“, - განაცხადა მარიამ ჯაშმა.

მან სტუდენტებს აუწყა, რომ კულტურისა და სპორტის სამინისტროს მხარდაჭერით, ახალი სასწავლო წლიდან, თეატრისა და კინოს უნივერსიტეტს ექნება სრულიად ახალი ტელესტუდია და აღნიშნული სტუდიისთვის საჭირო შესაბამისი თანამედროვე ტექნიკა. ტელესტუდია სამივე სახელოვნებო უმაღლესის (თეატრისა და კინოს უნივერსიტეტი, სამხატვრო აკადემია, თბილისის სახელმწიფო კონსერვატორია) სტუდენტებს მისცემს შესაძლებლობას ისარგებლონ აღნიშნული ტექნიკითა და სივრცით.

საქართველოს კულტურისა და სპორტის სამინისტროს მხარდაჭერით, თეატრისა და კინოს უნივერსიტეტის I კორპუსის სრული რეაბილიტაცია განხორციელდა. აღდგა თეატრალური უნივერსიტეტის შენობის მთავარი შესასვლელის კიბე და ბაქნების დაზიანებული ადგილები, უკანა ფასადი, ეზოს შესასვლელები, სრულად გარემონტდა შენობის ინტერიერი და სასწავლო აუდიტორიები. რესტავრაცია ჩაუტარდა რუსთაველის თეატრის მე-3 დონეზე მდებარე აკაკი ხორავას სახელობის აუდიტორიის თანდართულ ორიენტალისტურ მოხატულობას. უნივერსიტეტის სასწავლო სცენა აღიჭურვა თანამედროვე ტექნიკური აპარატურით, ასევე, გარემონტდა მაყურებელთა დარბაზი. მთლიანად გამოიცვალა ელექტროგაყვანილობა, გათბობისა და გაგრილების სისტემები, დამონტაჟდა სახანძრო უსაფრთხოების სისტემა, გამაგრდა სართულებსშორისი გადახურვა, ტექნიკურად გაიმართა შენობაზე დადგმული კოშკები და სველი წერტილები.