თავდაცვისა და უშიშროების კომიტეტსა და საქართველოში ნატოს სამოკავშირეო ოფისს შორის არსებული თანამშრომლობა და სამომავლო გეგმები მიმოიხილეს კომიტეტის თავმჯდომარის, ირაკლი სესიაშვილის და ოფისის ხელმძღვანელის, როზარია პულისის შეხვედრისას.

აღინიშნა, რომ კომიტეტი და სამოკავშირეო ოფისი ინტენსიურად თანამშრომლობენ და ქვეყნის უსაფრთხოების საკითხებზე და ნატო-საქართველოს ურთიერთობებზე საინტერესო შეხვედრებს მართავენ. შეხვედრაზე მხარეებმა ის საკანონმდებლო ცვლილებები და ახალი ინიციატივები განიხილეს, რომელზეც საკანონმდებლო ორგანო მიმდინარე პერიოდში მუშაობს.

ირაკლი სესიაშვილმა სტუმარს ინფორმაციული უსაფრთხოების შესახებ ახალი კანონპროექტის ძირითადი მიმართულებები გააცნო და პროექტის მიზნებსა და ამოცანებზე ისაუბრა.

შეხვედრაზე საუბრის ერთ-ერთ თემას ნატოს საპარლამენტო ასამბლეის სესიის განსახილველი საკითხები წარმოადგენდა. აღინიშნა, რომ ასამბლეის ფარგლებში, კიევში ნატო-საქართველოს საპარლამენტო კომისიის სხდომის გამართვა იგეგმება, რომელზეც ქვეყნის თავდაცვისუნარიანობის გაძლიერების და უსაფრთხოებისთვის მნიშვნელოვანი თემების განხილვა მოხდება.

კომიტეტის თავმჯდომარესთან გამართულ შეხვედრას ნატოს სამოკავშირეო ოფისის პოლიტიკური ოფიცერი და სამხედრო ოფიცერი დაესწრნენ.