პარლამენტის განათლების, მეცნიერებისა და ახალგაზრდულ საქმეთა და კულტურის კომიტეტების ერთობლივ სხდომაზე, ფინანსთა სამინისტროს მიერ წარმოდგენილი საქართველოს 2026 წლის სახელმწიფო ბიუჯეტის შესრულების 3 თვის მიმოხილვა მოისმინეს.

მომხსენებელმა, ფინანსთა მინისტრის პირველმა მოადგილემ გიორგი კაკაურიძემ 2026 წლის იანვარ-მარტის ძირითად მაკროეკონომიკურ პარამეტრებზე ისაუბრა.

მისი თქმით, I კვარტლის საშუალო რეალურმა ზრდამ 9.1% შეადგინა. რეალური მშპ-ის ზრდა იანვარში 7.9%-ია, თებერვალში - 8.8 %, ხოლო მარტში - 10.7%. 2026 წლის მარტისთვის წლიური ინფლაცია 4.3%-ია, ხოლო წლიური საშუალო ინფლაციის მაჩვენებელი - 4,4%.

გიორგი კაკაურიძემ საგარეო ვაჭრობისა და ტურიზმის მიმართულებებზე გაამახვილა ყურადღება. როგორც მან აღნიშნა, 2026 წლის იანვარ-მარტში საქართველოში საქონლით საგარეო სავაჭრო ბრუნვა 5 მილიარდ 867 მილიონი დოლარია, საიდანაც ექსპორტის მაჩვენებელი - 1 მილიარდ 723 მილიონი დოლარი, იმპორტი - 4 მილიარდ 143 მილიონი დოლარი. მისივე თქმით, 2026 წლის პირველ კვარტალში საქართველოს უმსხვილესი სავაჭრო პარტნიორი ევროკავშირია, რომლის წილი მთლიან საქონელბრუნვაში 21.4%-ს შეადგენს.

რაც შეეხება ტურიზმს, მომხსენებლის ინფორმაციით, 2026 წლის პირველ კვარტალში ტურისტული ვიზიტორების რაოდენობა 997 ათასს აჭარბებს, რაც შარშანდელ ანალოგიურ მონაცემზე 4%-ით მეტია. მისი თქმით, ტურიზმიდან მიღებული შემოსავალი 829 მილიონი დოლარია.

გიორგი კაკაურიძემ ასევე ისაუბრა საქართველოს 2026 წლის იანვარ-მარტის ნაერთი და სახელმწიფო ბიუჯეტის შემოსავლების შესრულების შესახებ.

ფინანსთა მინისტრის პირველმა მოადგილემ განსაკუთრებული ყურადღება, მხარჯავი დაწესებულებების მიხედვით, სახელმწიფო ბიუჯეტის ასიგნებების შესრულებაზე გაამახვილა. მისი თქმით, 2026 წლის 3 თვის მონაცემებით, განათლების, მეცნიერებისა და ახალგაზრდობის სამინისტროს ათვისებული 625 მილიონ ლარამდე აქვს და ათვისების მაჩვენებელი 92%-ს შეადგენს. კულტურის სამინისტროს ათვისებული აქვს 68.7 მილიონი ლარი და ათვისების მაჩვენებელი 77%-ია.

კომიტეტების გაერთიანებულ სხდომაზე ფინანსთა სამინისტროს მიერ წარმოდგენილი საქართველოს 2026 წლის სახელმწიფო ბიუჯეტის შესრულების 3 თვის მიმოხილვა ცნობად მიღეს.