პარლამენტის თავმჯდომარის მოადგილე, კახაბერ კუჭავა დიდი ბრიტანეთისა და ჩრდილოეთ ირლანდიის გაერთიანებული სამეფოს საგანგებო და სრულუფლებიან ელჩს საქართველოში, მარკ კლეიტონს შეხვდა.

შეხვედრის მთავარი თემა იყო დიდი ბრიტანეთისა და ჩრდილოეთ ირლანდიის გაერთიანებული სამეფოს საგარეო თანამეგობრობისა და განვითარების სამინისტროს ევროპისა და ამერიკის საგარეო საქმეთა მინისტრის, ვენდი მორტონის საქართველოში ვიზიტი და საქართველოს პარლამენტის თავმჯდომარესთან, არჩილ თალაკვაძესთან გამართული შეხვედრა, რომელსაც კახაბერ კუჭავაც ესწრებოდა.

ხაზგასმით აღინიშნა, რომ მსგავსი მაღალი დონის ვიზიტები ხელს უწყობს ორ ქვეყნას შორის არსებული პოლიტიკური და მეგობრული ურთიერთობების კიდევ უფრო გაღრმავებას.

მხარეებმა, ასევე, ისაუბრეს ორმხრივ სტრატეგიულ თანამშრომლობასა და საპარლამენტთაშორისო ურთიერთობების საკითხებზე. მარკ კლეიტონის განცხადებით, გაერთიანებული სამეფო მტკიცედ უჭერს მხარს საქართველოს ევროპულ და ევროატლანტიკურ მისწრაფებებს და ამ მიმართულებით საქართველოს პარლამენტის მიერ გადადგმულ ნაბიჯებს. დამატებით, ელჩმა კიდევ ერთხელ დაადასტურა საქართველოს სუვერენიტეტისა და ტერიტორიული მთლიანობის ურყევი მხარდაჭერა საერთაშორისოდ აღიარებულ საზღვრებში.

როგორც კახაბერ კუჭავამ აღნიშნა, საქართველოს პარლამენტში არსებული მეგობრობის ჯგუფები აქტიურად იქნება გამოყენებული, როგორც კიდევ ერთი პლატფორმა, საპარლამენტო ურთიერთობების შემდგომი გაღრმავებისა და ქვეყნებს შორის არსებული თანამშრომლობის კიდევ უფრო განმტკიცებისთვის. პარლამენტის თავმჯდომარის მოადგილემ ხაზი გაუსვა ვესტმინსტერის დემოკრატიული ფონდის (WFD) მიერ ორგანიზებული პროგრამებისა და პროექტების მნიშვნელობას.

შეხვედრას, ასევე, ესწრებოდნენ დიდი ბრიტანეთისა და ჩრდილოეთ ირლანდიის გაერთიანებული სამეფოს საგანგებო და სრულუფლებიანი ელჩის მოადგილე, ქალბატონი მარგარეტ ბელოფი და კახაბერ კუჭავას სამდივნოს მთავარი სპეციალისტი, თამარ გელდიაშვილი.