საქართველოს პარლამენტის თავმჯდომარის მოადგილე ნინო წილოსანი და პარლამენტის აპარატის უფროსი კახა ოქროჯანაშვილი პარლამენტში სტაჟირების პროგრამის მონაწილეებს შეხვდნენ. 

შეხვედრაზე სტაჟირების პროგრამის მნიშვნელობასა და ახალგაზრდებისთვის პროფესიული განვითარების შესაძლებლობებზე ისაუბრეს.

ნინო წილოსანის განცხადებით, პარლამენტში სტაჟიორების ახალი ნაკადის მიღება ახალგაზრდებისთვის პროფესიული გამოცდილების შეძენის მნიშვნელოვანი შესაძლებლობაა.

„პარლამენტში სტაჟიორების ახალი ნაკადი მივიღეთ. სასიხარულოა, რომ იზრდება როგორც სტაჟიორების რაოდენობა, ისე მათი შემდგომი დასაქმების შესაძლებლობები. მივესალმებით თითოეულ ახალგაზრდას, რომელიც პარლამენტში მიიღებს პრაქტიკულ გამოცდილებას და ამ გზით საკუთარი პროფესიული განვითარების მნიშვნელოვან ეტაპს გაივლის“, - განაცხადა ნინო წილოსანმა.

როგორც პარლამენტის აპარატის უფროსმა კახა ოქროჯანაშვილმა განაცხადა, სტაჟირების პროგრამა ახალგაზრდებს მნიშვნელოვან პრაქტიკულ გამოცდილებას აძლევს და სახელმწიფო უწყებებს ნიჭიერი კადრების შერჩევაში ეხმარება.

„სტაჟირების პროგრამა მნიშვნელოვანია როგორც ახალგაზრდებისთვის, ისე სახელმწიფო უწყებებისთვის. ერთი მხრივ, ახალგაზრდები იღებენ იმ საბაზისო გამოცდილებას, რომელიც საჯარო სამსახურში საქმიანობისთვის აუცილებელია, ხოლო მეორე მხრივ, სახელმწიფო სექტორს შესაძლებლობა ეძლევა კონკურენტულ შრომის ბაზარზე ნიჭიერი და პერსპექტიული კადრები შეარჩიოს და მომავალში დაასაქმოს“,  - განაცხადა კახა ოქროჯანაშვილმა.
​

სტაჟირების პროგრამის მონაწილეები პარლამენტის სხვადასხვა სტრუქტურულ ერთეულში სამთვიან, ანაზღაურებად სტაჟირებას გაივლიან.