2011 წლის 26 მაისს მომხდარი მოვლენები გაიხსენა დღეს გამართულ ბრიფინგზე საქართველოს პარლამენტის წევრმა, კარლო კოპალიანმა.

„ვერაფრით გვერდს ვერ ავუვლი იმ სისხლიანი თარიღის გახსენებას, რომელსაც ერქვა 2011 წლის 26 მაისი. როდესაც მაშინდელმა ხელისუფლებამ საკუთარი ხალხის მიმართ არნახული სისასტიკე გამოიჩინა და საშინელი მეთოდით გაუსწორდნენ მომიტინგეებს, რასაც ადამიანთა მსხვერპლი მოჰყვა“, - განაცხადა კარლო კოპალიანმა.

მან დეტალურად გაიხსენა იმ საშინელ ღამეს განვითარებული ტრაგიკული მოვლენები, რომლის მონაწილე და თვითმხილველიც თავადაც იყო.

„მე, მაშინ მეშვიდე მოწვევის პარლამენტის წევრი ვიყავი, თუმცა ამასაც არ მოერიდნენ სადამსჯელო ოპერაციის ჯალათები და დამაპატიმრეს. როგორც იმ საშინელი ღამის უშუალო მონაწილე და თვითმხილველი მოვითხოვ, რომ ამის შემოქმედი ხალხი, რომლებიც დღესაც თავაწეულები გვესაუბრებიან დემოკრატიულ პროცესებზე, აუცილებლად უნდა დაისაჯოს“, - განაცხადა დეპუტატმა.

მისი თქმით საქმის გამოძიება და დამნაშავეების სათანადოდ დასჯა იქნება პრევენცია იმისა, რომ მომავალში ანალოგიური რამ აღარ განმეორდეს და საკუთარი ხელისუფლება აღარასოდეს დაუპირისპირდეს საკუთარ ხალხს.