დეპუტატი ზურაბ ცქიტიშვილი პარლამენტიდან მიდის. ამის შესახებ ჟურნალისტებს მან დღეს პარლამენტში გამართულ პრესკონფერენციაზე აცნობა. «ჩემთვის მეტად მნიშვნელოვანი გადაწყვეტილება მივიღე. მიმდინარე წლის 8 თებერვალს საქართველოს პარლამენტის თავმჯდომარეს წერილობითი თხოვნით მივმართე, რათა პარლამენტმა ჩემი სადეპუტატო უფლებამოსილების შეწყვეტის საკითხი განიხილოს", - განაცხადა პრესკონფერენციაზე ცქიტიშვილმა. მისივე განმარტებით, პროცედურა დაწყებულია და პარლამენტის საპროცედური საკითხთა და წესების კომიტეტი უახლოესი პარლამენტის პლენარულ სხდომაზე დააყენებს ამ საკითხს.

ზურაბ ცქიტიშვილი წასვლის მიზეზად პარლამენტში თავისი შესაძლებლობების ამოწურვას ასახელებს და ბიზნესში დაბრუნებას აპირებს. "ამ წლების განმავლობაში არაერთი კანონის ინიციატორი და ავტორი ვიყავი. პოლიტიკაში ბიზნესიდან მოვედი და ვუბრუნდები ისევ ბიზნესს. შევეცდები ხელისუფლებასა და ბიზნესს შორის ერთგვარი დამაკავშირებელი რგოლის ფუნქცია შევასრულო», - განაცხადა ზურაბ ცქიტიშვილმა. იგი "ნაციონალურ მოძრაობაში" რჩება, სადაც მას ერთ-ერთი მაღალი თანამდებობა უკავია.

ზურაბ ცქიტიშვილი საქართველოს პარლამენტის წევრი 1995 წლიდანაა.