პარლამენტმა 80 ხმით 8-ის წინააღმდეგ, მესამე მოსმენით მიიღო „შეზღუდული შესაძლებლობის მქონე პირთა უფლებების შესახებ“ კანონში ცვლილება, რომელიც შეზღუდული შესაძლებლობების პირებისთვის ვებსაიტებისა და  აპლიკაციების მისაწვდომობის ვალდებულებას ადგენს.

კერძოდ, განისაზღვრა დაწესებულებები - ადმინისტრაციული ორგანოები და კერძო სამართლის ზოგიერთი სუბიექტი, რომლებიც ვალდებულები არიან ვებსაიტებისა და მობილური აპლიკაციების მისაწვდომობა განახორციელონ.

აღნიშნული ვალდებულება ვრცელდება კერძო სამართლის იმ სუბიექტის ვებსაიტსა და აპლიკაციაზე, რომელიც ახორციელებს: ადრეული და სკოლამდელი აღზრდისა და განათლების, ზოგადი, უმაღლესი ან პროფესიული განათლების მომსახურების მიწოდებას;  სამედიცინო მომსახურების მიწოდებას ან სახელმწიფო ბიუჯეტით, ავტონომიური რესპუბლიკის რესპუბლიკური ბიუჯეტით ან მუნიციპალიტეტის ბიუჯეტით დაფინანსებული შეზღუდული შესაძლებლობის მქონე პირისთვის განკუთვნილი სოციალური დაცვის პროგრამის მიწოდებას; სადაზღვევო მომსახურებას; საბანკო ან მიკროსაფინანსო საქმიანობას; კომუნალური ან ინტერნეტქსელებით მომსახურების საბოლოო მომხმარებლისთვის მიწოდებას (ელექტროენერგიის მიმწოდებელი, ბუნებრივი გაზის მიმწოდებელი, წყალმომარაგების ლიცენზიატი, ელექტრონული კომუნიკაციის კომპანია); ავტოსატრანსპორტო, საჰაერო, საზღვაო ან სარკინიგზო სატრანსპორტო საშუალების გამოყენებით მგზავრთა გადაყვანის მომსახურებას. 

ცვლილება ასევე შეეხება კერძო სამართლის სუბიექტის იმ ვებსაიტსა და აპლიკაციას, რომლის საშუალებითაც ის ახორციელებს: სურსათის საცალო რეალიზაციას; საფოსტო/საკურიერო მომსახურების მიწოდებას; მესამე პირის მიერ წარდგენილი პირთა განუსაზღვრელი წრისთვის ხელშეკრულების დადების შესახებ წინადადების (მოწვევა ოფერტზე) თავმოყრასა და გავრცელებას.

კანონში ცვლილებით განსაზღვრული ვალდებულება არ ვრცელდება ადმინისტრაციული ორგანოსა და კერძო სამართლის სუბიექტის იმ ვებსაიტებისა და აპლიკაციების მიმართ, რომლებიც გამოქვეყნდება 2027 წლის 1 სექტემბრამდე და მათზე ინფორმაციული განახლება არ განხორციელდება 2027 წლის 1 სექტემბრის შემდეგ.

ინფორმაციულ განახლებად არ ჩაითვლება განთავსებული მასალის ტექნიკური რედაქტირება.

მიღებული ცვლილება არ წარმოშობს ადმინისტრაციული ორგანოსა და კერძო სამართლის სუბიექტის ვალდებულებას, ჰქონდეთ ვებსაიტები და აპლიკაციები.

​ამასთან, დადგინდა, რომ ადმინისტრაციული ორგანოსა და კერძო სამართლის სუბიექტის მიერ ვებსაიტებისა და აპლიკაციების მისაწვდომობის უზრუნველყოფის ვალდებულებების შეუსრულებლობა ჩაითვლება დისკრიმინაციად.

კანონპროექტის ინიციატორები არიან პარლამენტის წევრები: რატი იონათამიშვილი, ალუდა ღუდუშაური, ზურაბ ქადაგიძე, სუმბატ კიურეღიანი, ირაკლი ჭეიშვილი, სალომე ჯინჯოლავა, სავალან მირზოევი და თორნიკე ფაღავა.